麥浚龍（Juno）即將推出新碟，完成宣傳工作後，Juno會暫停出碟，轉而把精力花於電影上，當然他也不排除再跟緋聞女友鍾欣桐（阿嬌）合作。然而最想合作的，Juno首選曹查理，就算片酬得一蚊也不計較。
麥浚龍每次出碟都會邀請有份量的前輩歌手合作，今次他便找了林夕和周耀輝負責全張大碟的歌詞。Juno不諱言等待林夕的歌詞一定要抱着不可心急的心態，他日前說：「我等佢第一首歌等咗半年，其實每次傾電話都傾兩個鐘，但唔會追佢交歌，搵得林夕寫歌就要有耐性。直至我收到佢嘅詞，我覺得一切都係值得，佢寫嘅嘢真係好有詩意。」
「唔知點解傳分手」
完成大碟後，Juno便會暫時放下音樂工作，轉攻電影和時裝，他說：「我覺得拍戲畀到另一種滿足感我，我好希望學多啲幕後知識，又想同多啲唔同嘅電影人合作。」
工作方面，Juno滿肚大計，感情方面，最近卻有傳他已與阿嬌分手，對此Juno說：「我都唔知點解會傳到去分手，我只可以講我呢一刻係單身，記者朋友每次問我感情事我都會答，將來拍拖都會公開，總之呢一刻喺Juno身邊出現嘅女仔唔係女朋友。我想再講一次同阿嬌係好朋友，只不過我係男佢係女，大家先會覺得我哋有曖昧。」
欣賞樓南光、陳惠敏
再問Juno會否與「好朋友」鍾欣桐再次在電影上合作？他說：「我唔介意同任何人合作，如果畀我揀，我呢一刻最想同曹查理、樓南光、陳惠敏同陳觀泰合作，我細細個好鍾意睇佢哋嘅戲，有導演可以撮合到我同佢哋是但一個，我唔介意收一蚊象徵式片酬。」
採訪：李珮洳
攝影：陳慧安
化妝：Khaki（MaeVonMakeup）
