【本報訊】看着市民一個一個的進場，靜靜佔據維園每一個角落與空間，支聯會在過去20年，成功令六四精神薪火相傳。點點燭光，代表着20萬顆良心，支聯會主席司徒華感激香港人「表達咗佢哋嘅良心」，足證香港是中國的良心。雖然港人「人心不死」，司徒華仍然未感興奮，因為等待六四真正平反的一天，才是值得高興的一天。
記者：許偉賢、林俊謙
上星期的六四大遊行人數創新高，支聯會早就預料昨晚參加燭光集會的人數特別多，但未想過會有20萬人。當司徒華在台上宣佈：「（維園內）有得坐嘅地方都完全爆棚，今晚創造咗一個歷史奇蹟。」台下足球場內15萬市民無不歡呼鼓掌；就連未能進場、只能在足球場外圍參加的市民也熱烈拍掌，讚賞港人的執着不屈。
點名「感激」曾蔭權
司徒華感激香港「人心不死」，坦言今年特別多反面言論出現，「本來係想打擊我哋嘅紀念活動，點知反而刺激咗好多市民踴躍參加」，他點名「感激」特首曾蔭權及港大學生會前會長陳一諤，因為有他們的六四謬論，刺激起市民的參加熱情。至於曾蔭權有何教訓？司徒華只稱「要由曾蔭權自己領略。」
雖然今年人數創新高，但司徒華不感興奮或滿意，因為要到平反六四那一天，才值得高興。他力促政府將六四歷史加入教學課程，「因為呢啲係歷史，唔能夠抹煞，年輕人一代必須認清史實。」
20年的堅持沒有白費，一早到場打點的支聯會副主席李卓人留意到今年特別多年輕人到場，認為反映薪火相傳目的達到。
中國政府一直將六四視為禁區，試圖抹去人民的六四記憶，但李卓人指今年參與人數破紀錄，「就證明中央試圖系統性刪除六四記憶係唔成功嘅」。曾蔭權就六四的見利忘義言論至少不代表現場的20萬港人，李卓人直指，20萬人參與集會，已經向曾蔭權傳送強烈訊息──港人支持民主的決心不變，「如果佢再拖延香港民主，就係千古罪人。」
身為支聯會常委的教協會長張文光也在台上慷慨陳詞，指港人過去20年無論風雨，都堅持平反六四，「今晚嘅燭光，唔係點畀曾蔭權睇，佢冇資格睇。呢啲燭光係點畀全世界華人以及全中國睇，話畀人聽，香港係中國嘅良心。」
帶兒參與 認識六四
尊子
政治漫畫家
「今年係六四20周年，所以特登帶埋老婆同讀緊幼稚園嘅仔參加燭光集會，希望個仔可以從小就認識到六四嘅事實。我估都有排先可以平反到六四，但就算再等耐啲，我都會年年嚟燭光集會，直至等平反嗰日。個仔第二時係咪接我手繼續畫諷刺時弊嘅漫畫其實唔重要，最緊要佢長大之後可以明辨是非，好似認識六四事實咁，我就好滿足。」
身為港人 責任重大
黎智英
壹傳媒創辦人
「我只係想講一點，就係今晚有咁多人嚟，證明曾蔭權話代表我哋，其實係代表唔到。喺呢度嘅香港人，代表咗13億中國人，呢個先至係事實。我覺得我哋身為香港人，都要代表到中國人，呢個責任同象徵都好重要。年輕人睇多啲，就會知多啲六四歷史，我諗年輕人一定會了解到。」
薪火相傳 送來驚喜
李柱銘
民主黨創黨主席
「我真係冇諗過今日有咁多人，香港人真係一次又一次向我送上驚喜。今日最感動嘅係有好多年輕人到場，尤其係一班89年出世、未經歷過六四嘅20歲年輕人上台，表明佢哋堅持平反六四嘅決心。今年六四咁多人，應該係同20周年有關，亦都因為好多市民睇到有啲年輕人歪曲咗歷史，所以要企出嚟，講出歷史嘅真相。」
告訴特首
不代表我
梁家傑
公民黨副主席
「特首曾蔭權話代表我哋，但呢種見利忘義、唯利是圖嘅態度，絕對代表唔到香港嘅普遍市民。大家今晚嚟呢度，就係要點起呢點燭光，表達曾蔭權唔代表我嘅訊息。香港係中國土地上其中一個可以公開悼念六四嘅地方，無論係悼念死去嘅同胞，抑或表達對國家民主進步嘅期望，呢一點燭光，對中國發展都非常重要。」
港人力量 將傳內地
Kasper
高志活次子
「這是我首次參加香港的六四燭光集會，看見這麼多群眾一起悼念，非常感動。我會拍下照片及錄像，帶返丹麥給爸爸看。其實丹麥以至歐洲，仍然有人關注六四，起碼丹麥今年有電視台播出天安門紀錄片。我覺得香港人民力量很重要，因為香港是全中國唯一可以自由表達六四哀思的地方，這個訊息將會傳遍內地，鼓舞全中國人為民主而抗爭。」
無悔當初 終有公道
劉千石
前支聯會常委
「我無悔20年前所做嘅事（協助拯救民運人士以及組織支聯會），亦都為20年後嘅今日，有咁多人坐埋一齊點起燭光，覺得非常感動。當然，我都會尊重今日冇嚟到燭光集會嘅人。我相信終有一日，唔同政見嘅人士，甚至流亡海外嘅人士，都可以返到嚟佢哋自己最愛嘅國家。我亦相信，終有一日，歷史會還呢件事件一個公道。」
年輕一代 一起承擔
陳巧文
港大學生
「今年係我第六年參加六四燭光集會，從未試過見到咁多人，真係好感動。香港人其實都係一如以往，記得六四，支持平反，冇因為事件已經過咗20年而淡忘。其實今年六四對學生嘅意義特別重大，尤其港大成功罷免咗陳一諤，反映歷史不會受到呢啲人扭曲，香港嘅年輕一代，應該一齊承擔起呢一件歷史、呢一個責任。」
每次講起 都會流淚
張同祖
導演
「呢件事唔可以忘記，每次我講番起都會喊。89年拍緊《再戰江湖》，鄧光榮、任達華、李美鳳係主角，點知4月學潮開始，都冇心機拍，停工個幾月，6月中先復工。89年，好多戲嘅反派都叫李鵬或者楊尚昆。97年我拍咗套《對不起，多謝你》，係側面影射六四。會唔會開拍六四電影？就算有市場，有冇老闆呢？」
