轆Book：直擊英國MINI派對（上）：50大壽飛身助興

轆Book：
直擊英國MINI派對（上）：50大壽飛身助興

MINI為慶祝50周年壽辰，早前於誕生地英國大搞MINIUNITED派對，我就親身直擊咗呢個難得一會嘅盛事。巨型嘅場地、數以萬計嘅入場人次、過萬部Mini展現眼前嘅震撼場面，即使非MINI車主如我，都會被呢個以財力同人力悉心打造嘅MINI嘉年華所打動，心郁郁返香港買番架做Fans。

記者、攝影：許維雅
鳴謝：MINIHongKong（31299022）

雖說可以親身到英國直擊MINI50周年派對，心情應該興奮莫名，但未出發前都曾擔心只係跟大型記招差不多嘅宣傳活動，無太多得意事跟大家分享。不過，當我抵達Silverstone呢個一連三日舉辦MINIUNITED生日會嘅場地，我就知道先前嘅煩惱實屬多餘。未到大會嘅開放時間，門口嘅人龍之長、泊喺停車場嘅MINI數目之多，已經令我即時振奮。在巨型會場內，節目大致可分為四類，有喺包圍整個場地嘅賽道上舉行、由多架經典MINI賽車競賽爭逐嘅MINIRACING；有大堆小朋友聚集嘅MINIADVENTURES，包括跳彈床及攀石等冒險遊戲；有狂熱分子大晒冷嘅MINIMANIAC自家DIY嘅古靈精怪MINI，多到睇極唔完；最吸引我必然係以MINI50YEARS作主題嘅中心位置，睇拉車比賽夠Fun，去CollectionShop掃紀念品夠High，踩到夜晚邊飲啤酒邊聽「英倫搖滾教父」PaulWeller嘅演唱會夠Crazy。

■等足一日先等到PaulWeller出場，亦無損樂迷嘅興奮心情。

■會場內有好多小店，最特別係呢架迷你雙層巴士，充滿英國特色。

■最受車主歡迎嘅紀念品必定係呢個側鏡套。約$850/1對

■50周年Tee，約$150。而黑色毛毛電話頸繩係紀念品中最靚之選，約$120。

■現場有Postcard、貼紙同海報免費索取留念，我當然唔會錯過。

爬去做Fans

當日陽光普照，仲要夜晚八點都未肯收太陽，曬足咁多個鐘其實都幾攞命，但Fans們嘅熱情似乎一啲都無減，有人爭取時間跟每一架特別版MINI拍照留念，互相交流改車意見、有人就聽住現場DJ播放嘅強勁音樂，盡情喺草地上享受日光浴，而我當然跑去盡玩盡睇各項精采節目。有機會揸住架MINI瘋狂掟彎提升技術固然興奮，揸埋架高卡車互碰互撞互相爬頭簡直足以刺激體內所有神經。不過，要數最精釆始終係MINI花式表演，睇住部車仔載住現場觀眾側身瘋狂玩花式、避障礙，一幕幕驚心動魄場面睇到我目瞪口呆，即使其實已經攰到死，都唔介意死爬爛爬搵個較高位置欣賞咁難得一見嘅場面。所以，當日入場人士係咪MINI迷都好，我相信亦足以令佢哋玩夠睇夠揸個夠，不知不覺為呢架迷你車仔而着迷。