高呼平反六四聲音，噚晚響徹銅鑼灣，傳遍全香港，有啲心聲我哋聽唔到，但睇得出。八方噚晚去維園，發現唔少人悼念六四都有自己一套衫，唔一定係平反六四、追究屠城責任，16歲嘅中五學生劉同學，身上件T恤寫住「人在做、天在看」，佢同八方講，呢件衫喺為利東街街坊爭取權益時着過，雖然同六四無關，不過佢認為「人在做、天在看」呢兩句說話，最啱形容屠城暴行，所以噚晚着住去維園表態。
高官打黑白呔明志
美國人Peter着咗件寫滿中文字嘅白色Tee，係DIY作品，認為必須追究屠城責任，暴君下台，否則香港遲早係另一個天安門。佢家在港做平面設計師，20年前六四事件時，佢在三藩市都有去唐人街參加悼念活動，情景歷歷在目，所以定居香港，家住南丫島都去維園參加燭光集會。Peter話香港仍然好自由，如果後生仔唔珍惜機會認識六四歷史，俾當權者蒙蔽十分可悲。
年屆40嘅丁先生預先着一件7.1遊行T恤，八方問佢仲有幾個星期先到7.1，點解咁心急呢？佢話香港人7.1上街爭取民主嘅精神，同當年北京學生要求國家民主化一脈相承，所以着呢件衫十分適合，佢話03年首次上街因為好憎老董，今年會再遊行，因為好不滿煲呔。
雖則香港充滿自由空氣，不過唔係人人可以公開表態，高官要保持政治中立，所以唔可以高調參加六四悼念活動，但又唔想好似煲呔咁埋沒良心，惟有低調行事，八方聽聞有官員一直堅持參加燭光集會，但近年官運亨通越嚟越高級，為免惹人注目有麻煩，所以冇再去維園。
人唔到，心仍在，據知佢每年六四都會打一條黑白色領呔，象徵對六四事件立場黑白分明，佢坦言唔係要其他人領略到佢默默悼念，只係本住自己良心咁做。對於煲呔向錢看態度，呢位高官不以為然，指開槍殺死手無寸鐵嘅學生一定係極大錯誤，因為學生唔係要推翻中共，只係要求改革同反貪，所以佢堅持要平反六四，莫失莫忘。
mailto:[email protected]