全球經濟不景氣，好多大財團都要破產兼執笠，但係有啲大公司都想藉呢個機會響朵，好似從事風險管理、服務保險及人力資本諮詢等服務嘅怡安保險公司（AON）咁，周三同英超球會曼聯簽下4年球衣贊助商合約，總值高達8,000萬鎊（約10.1億港元），即每年2,000萬鎊。咁嘅時勢落咁重本，AON都算超有膽量同份量。
AON簽4年最貴贊助
曼聯家用緊嘅球衣贊助商AIG都係保險公司，不過經過金融風暴後負債纍纍，仲要靠美國政府出手打救先至唔使破產。鬼咩，AIG每年畀曼聯嘅贊助費成1,400萬鎊，以目前咁嘅經濟環境，講真真係維唔到皮，於是喺下年5月後唔同紅魔續新合約。AIG同曼聯仲有一年合約，聽講AIG本來連最後嘅1,400萬鎊都交唔出，要靠美國嘅納稅人幫手先搞得掂，所以冇財力同曼聯合作落去。
紅魔會着埋印有AIG標誌嘅球衣到2009/10球季尾，之後由2010/11球季開始就會重新出過一件新波衫，到時大家就會見到AON呢個新贊助商。AON今次提出8,000萬鎊嘅4年合約，打破晒舊有嘅最高球衣贊助商紀錄。德甲球會拜仁慕尼黑家陣用緊嘅球衣贊助商，係德國電訊T-Home，據講每年會科水1,700萬鎊畀拜仁；但係相比起AON嚟緊畀2,000萬鎊曼聯，兩者仲差300萬鎊咁多。紅魔之所以成為目前全球最富有球會，咪因為啲錢咁樣塞埋嚟囉。
AIG贊助着多一季
嚟緊曼聯就會去中東作季前熱身賽，由於AIG撲到水贊助埋最後一年，於是紅魔焗住叫「一剔」加緊出件新款波衫，準備佢哋下個月友賽同新球季時用。唉，作為曼聯球迷嘅話，又要買多件幾無謂嘅新波衫，事關個款雖然係新，但AIG個Logo只係會着多一年；到咗2010/11球季，屆時個心口又換上AON贊助，荷包再減磅無可避免。其實有兩個英文字母唔同咗啫，掠水咩！