扮代表香港人嘅特首煲呔，噚晚當然冇現身維園，傍晚時去咗灣仔會展出席世界家庭醫學大會做開幕禮嘉賓，數以萬計香港人以行動話畀佢知，大家冇好似佢咁見利忘義唔記得咗六四，不過煲呔繼續迴避，噚晚被問到是否應該平反六四的問題時，封口唔答記者問題。
傳陳一諤着草返大陸
出席儀式嘅內地醫學專家鍾南山亦有口難言，表示六四問題太敏感，所以不方便說話，講豬流感就無問題。至於因六四言論被踢落台嘅港大學生會前會長陳一諤，近日銷聲匿迹潛咗水，有港大同學報料，早前聯絡佢一齊參加燭光集會，不過陳一諤表示唔會參加任何支聯會舉辦嘅活動，六四期間更會離開香港。
八方打聽後，有傳陳一諤着草返咗大陸，佢曾向同學稱，暑假期間要做啲有意義嘅工作，打算返內地做義工，所以相信佢家應該身在內地，做緊啲佢認為比要求平反六四更有意義嘅事。八方曾致電搵佢，但一直冇回音。