近日憑熱爆無綫劇集《巾幗梟雄》人氣急升的商天娥，最近被指明年與男友李偉誠拉埋天窗，前晚她承認此事，更自爆被羅太汪明荃（阿姐）游說到拉斯維加斯結婚，令她心郁郁。
無綫熱爆劇集《巾幗梟雄》中，飾演二奶奶的商天娥被帶挈人氣急升，工作接踵而來，將會開演唱會及做舞台劇，早前更有指她將會與拍拖四年、從事金融外滙及燈飾生意的男友李偉誠明年拉埋天窗，前晚她承認此事。
「都係為咗父母」
前晚娥姐和新劇《掌上明珠》一班演員宣萱、林保怡和陶大宇等到上水拍攝一場點孔明燈的煞科戲，對於婚訊，娥姐坦言被不少人催婚，她說：「好似之前《巾幗》嘅演員都有問我係唔係結婚，仲話到時會同我頂酒㖭，就連之前代言嘅減肥中心都問我使唔使減肥。」記者追問她何時結婚，她說：「有意思出年結婚嘅。」
娥姐自爆早前在化妝間碰到新婚的汪明荃，當時娥姐打趣表示被她爬頭，阿姐即滔滔不絕極力游說她到拉斯維加斯結婚，娥姐說：「阿姐話喺拉斯維加斯搞又快又方便，一家人又可以喺嗰邊睇騷，真係有好多好處。其實我如果結婚都係為咗父母，不過我哋有好多朋友，唔搞都唔得。」
另外，宣萱表示拍完《掌》劇後便休息，她說：「家睇緊樓，因為父母會返嚟香港住，我唔怕佢哋催婚，但就有講過要抱孫囉。」
採訪、攝影：楊潔雯