本月30日是黃家駒死忌，昨日有自稱Beyondfans的人爆料指家駒的墓碑被惡意破壞，並暗指早前為30萬名錶大動肝火的黃家強置亡兄的墓碑不顧，令家強勞氣說：「搞先人個墓一定有報應。」
樂壇班霸Beyond的靈魂人物黃家駒本月30日逝世16周年，而下周三（10日）是其生忌，忠實歌迷每年6月例必到將軍澳華人永遠墳場拜祭家駒，16年來都無事，不過昨日本報收到一封署名Beyondfans的電郵，內容指家駒墓碑因天然耗損致遺照及部份金字褪色，早前已有歌迷透過電郵通知其弟黃家強，但至今墓碑未有修理。
不滿被指吞遺產
信中又指近日家駒的墓地被人惡意破壞，令fans心痛，斥家強只着緊貴錶而未有為亡兄做事，電郵中提及「家強為咗隻30萬嘅錶可以追究到底，不知家駒的墓地被人惡意破壞，家強又會唔會追究到底？……家強能把家駒的墓地修妥，這是他的責任，成日掛在口邊掛住哥哥是沒用的，我們不希望看見家強那隻30萬嘅手錶會比家駒重要。」
事緣早前家強在又一城一間錶行豪買價值30萬的愛彼錶，事後他不滿手錶行快兩分鐘，故大鬧錶行要求換錶，最後換錶成功。對於被Beyondfans指摘，家強昨日接受本報電話訪問時勞氣表示從來未收過該fans的電郵，他覺得該名fans爆料居心叵測：「我試過解決，但係解決唔到，仲諗緊方法，唔通我日日坐喺度畀你睇我做乜嘢，有好多嘢係要同屋企人商量，點解要將兩件事拉埋嚟講，我俾人呃點解唔追究？我好嬲啲人成日話我攞晒阿哥嘅遺產，我父母仲喺度，你話合唔合情理，佢哋唔好再屈我。」
帶埋可樂拜亡兄
家強強調現時已想盡辦法處理亡兄墓碑的問題，但仍要一段時間處理，他力斥破壞者刻意破壞，特別是結他上的黑色筆痕：「佢一定有報應，得罪先人一定唔好運，搞人墓都唔會好。」家強又透露昨日曾到墳場拜祭亡兄，並帶了一罐可樂給家駒。記者詢問在該處打掃的阿嬸時，她看過家駒墓碑上的裂痕後就說：「係曬裂咗，唔係俾人整爛。」
採訪、攝影：娛樂突發組