有眼所見，唔少D-SLR新手買機，係為咗扮型、兼識影女仔。嘥咗部機喎！實在唔應該語帶歧視，相反多謝呢班人刺激本土經濟；再者同真心想學者相比，大家只係道不同，卻一樣目標為本，所以理應受到尊重。今集數碼達人就教大家夜攝人像時，點樣可以整色整水，得心儀女子歡心。睇完文字版後，記得Click入以下網址睇埋短片先好走。
記者︰陸俊雄
攝影︰林栢鈞
Model︰Algie@PureModels
驚喜唔使錢
電筒屋企有喇！有無諗過夜攝人像時，佢可以係超級百寶？其實大家只要預備好必要的裝備︰相機、閃燈、腳架，咁就可以開始寫大字。
做法其實好簡單，先搵一個有咁黑得咁黑的地方，好似我咁，拎住部Canon50D走去中環某個天橋底下，Set好腳架，裝埋580EXII閃燈，咁就可以Ready。當然有少少秘訣，大家要用慢快門，睇你寫幾多字而定，10秒以上唔少得；閃燈由TTL改用MMode，目的係要改變閃燈焦距，收窄閃光範圍；最後加埋苦練反方向寫字就完成，完全唔使額外再使錢。
必備工具
閃燈咪亂射
學完花巧嘢，當然會教你基本影夜間人像的技巧，唔熟閃燈操作的，更加要Click入短片教學睇。大家先要明白有錢買支儍瓜閃燈唔係大晒，要知道相機負責背景曝光，閃燈負責前景補光的分工原理先得。
君不見好多新手有燈就亂射，結果影出來一係後面勁黑，一係前面勁光，認真唔用好過用。初學可以用TTL閃燈模式，Set定腳架以防手震，先對背景測光，然後才向人對焦，閃燈就會自調補光輸出大小，咁就可影到張唔失禮嘅人像相。
街燈好幫手
明白正確影人的方法後，可以花多少少心思，借街燈和大廈光線來自製特效。最常見係拉爆，即是按下快門期間突然Zoom前Zoom後；影之前最好用腳架，快門速度保持在1/4秒至1/8秒之間，成功機會較大。另外，亦可以用街燈來畫圖案，模特兒企定，攝影師須要搖機。例如寫個m字時，搖機要像寫w字一樣，完全相反。
網址︰ http://av.appledaily.com