還記得麥兜扭計要去馬爾代夫，家貧的麥太為了唔想令麥兜失望，最終帶咗佢去山頂，睇到我眼濕濕。若故事發生在柬埔寨，而麥兜想去的是威尼斯，麥太帶他去的，就應該是暹粒的FloatingVillage吧。黃昏時在湖上泛舟，浪漫程度不比威尼斯輸蝕，雖然湖上有鱷魚，仲有水上豬欄，但我諗咗好耐……究竟豬識唔識游水㗎？
記者、攝影：吳允冲
鳴謝：MasterCard、HoteldelaPaix
智慧的母親
麥太與麥兜的故事幾令人感動，位於吳哥窟旁的達普倫廟，都有一個孝感動天小故事。寺廟於十二世紀末由賈耶跋摩七世下令興建，為的就是紀念母親；神殿內供奉的，是根據她形象所造的印度智慧女神般若佛母，性感辣媽Angelina的成名作《盜墓者羅拉：生命之匙》都在這裏取景。母親與智慧何時連上關係？難為我還經常話我母親點極都唔明，真不孝。為了補償我偉大的阿媽，我決定請佢去吳哥窟，睇著名的印度神像浮雕石刻和壁畫，再陪佢拜佛，最重要係以夕陽、黎明做背景，搵個睇到主塔倒影的靚位，為佢影一張寫真。即使在中午35℃最難捱的時分，我都會全程擔遮服侍周到。係咪好孝順呢。
一日通行證：約$156（20美金）
水上真人騷
「係咪似曼谷水上市場咁？」我以為這個暹粒FloatingVillage有艇仔在賣生果、手工藝品，卻原來是民居。我一到碼頭，導遊笑笑口：「你住5星級酒店，搭艇都係5星級，盛惠20美金！」但隔籬坐滿人的艇，都係位位6美金，他見我面有難色，連忙補鑊：「啲錢係用嚟幫村民！」又好，畀多幾倍價錢，換來的是我自己包了一隻艇！艇由河流駛入湖中，湖水是由喜馬拉雅山經印度到柬埔寨，已變成泥黃色，卻沒有垃圾和臭味，居民游水、洗碗、養魚、養鱷魚，甚至冲凉都在這湖中。小艇沿途經過的民居、學校、工廠，全都浮在水上，乍看有點像《一百萬零一夜》中孟買的貧民窟。水上屋沒有門窗，開放式設計，令我們這班遊客清楚見到屋內情況。這個水上村建在TonleSap湖上，是柬埔寨最大的湖，出產河產如螺仔及河魚，catfish則用來做著名的FishAmok。這個村唔係話去就去，村民在每年9月至1月水漲時，便會遷移上山。
FloatingVillage
船費：約6美金起，價錢不定，船程兩小時
簽卡自動捐單車
柬埔寨風光如畫，兒童卻面臨失學等問題，要幫助他們自立，其實唔使多花一毫，好似入住HoteldelaPaix，以MasterCard簽賬，就會捐出一架單車予暹粒的慈善機構，令學生返學更方便。去年9至12月期間，MasterCard已捐出三百多架單車，令遊客消費都可以隨時做善事。
Dos&Don'ts
囗切忌擘大口
要習慣和烏蠅蚊蟲做朋友，切忌無啦啦擘大口，我試過講得興高采烈時有隻曱甴狀的昆蟲企圖飛入口中，最後只降落在我嘴唇上，嚇死。
囗土產香茅味蚊膏夠勁
太陽和蚊都一樣毒，出門前最好搽太陽油及蚊怕水，水、帽、太陽眼鏡是防中暑必備三寶。要防蚊可用當地出產具香茅味的蚊怕膏，效果勁work。
出門提一提
簽證：持BNO或特區護照可申請網上或落地簽證。查詢：25460718（柬埔寨領事館）
機票：乘曼谷航空由香港至曼谷，再轉飛至暹粒，來回票價$3,450。查詢：36920888（東瀛遊）
酒店：HoteldelaPaixDeluxe客房每晚約$2,574起，查詢： http://www.hoteldelapaixangkor.com/
貨幣：1港元約兌544Riel
電壓：230V，兩圓腳或扁腳插座
下周柬埔寨
暹粒
有雷暴，25-34℃
