1913-2009別了，堅叔！
石堅與堅嬸李潔瑩，由初戀到結婚生子，一起走過逾半世紀幸福美滿的日子，是圈中模範夫妻。後來堅嬸病重，堅叔更為愛妻受洗，日夕祈禱求妻子康復。
石堅近年行動不便，加上去年曾因臀部發炎和生瘡入院接受治療，故日常除了到醫院覆診外，幾乎足不出戶。記者昨日探訪堅叔位於太子道西的寓所，屋內只得兩名女子及一年輕人，相信是堅叔的親人。當時兩女在看書，屋內仍放滿堅嬸的照片和書籍。記者表明來意，該女子愕然說：「唔得閒！」然後便關門。堅叔的街坊黃太則對堅叔離世表示惋惜，又謂一兩年前還見到他與菲傭出外散步，但近年已不見其影蹤。
發哥：佢份人冇得頂
雖然堅叔近年已沒跟圈中人來往，但仍與曾合拍《狂潮》和《網中人》等劇的周潤發聯繫，發哥更曾為堅叔覓良醫治理腳患。發哥目前在北京拍電影《孔子》，他昨日接受長途電話訪問時說：「堅叔90幾歲都算係笑喪囉！佢份人真係冇得頂，對所有人都好好，又好健談，係好有專業精神嘅演員。」
發哥表示和堅叔經常見面，他說：「知道堅叔對腳唔係咁好，早年堅嬸離開咗，冇乜人照顧佢，我就揸車帶佢睇醫生，希望幫佢醫吓腳患，病情時好時壞，近幾年我太忙，已經好少探堅叔。」發哥曾謂那時每周到堅叔寓所，孭他落樓睇醫生，後堅叔表示做治療時令他痛楚難當，故後期拒再覆診。
足患確令堅叔受了不少折磨，早年他還能走動時，常與堅嬸到外地旅遊，偶爾相約友人嘆茶敍舊。自經歷喪妻痛復足患纏繞，堅叔幾乎每天待在家中，日常起居由菲傭照顧。由於與四子兩女並非同住，故只能待假期等他們回家，但因為子女各自有家庭，很難齊人。前年初本報登門造訪，堅叔的女兒剛巧來探望，礙於有記者在場，故只逗留20分鐘便離開。堅叔看着女兒背影，一臉不捨。堅叔的兩名孫兒已大學畢業，其中一名更成為婦科醫生，堅叔也老懷大慰。
愛聽歌看《大長今》
沒有老伴的日子，堅叔與書為伴，他曾說最愛看關於戲劇和演技的書，也會聽歌和看電視，特別是李克勤和韓劇《大長今》。演員則獨愛周潤發。
談到與堅嬸情緣，源於1934年合演話劇，拍拖兩年便結婚，堅嬸偶爾在堅叔主演的電影客串，如劇集《霸王谷》，堅嬸就客串飾演堅叔的街坊，還有不少對手戲。堅嬸是虔誠基督教徒，堅叔本來沒有宗教信仰，後來見太太久病未癒，決定入教受洗，並虔誠禱告，祈求妻子早日康復。堅叔曾笑說：「我認為夫婦間唔一定永遠聽晒話咁就好，有時頂吓頸，為一個問題嗌吓，仲會講出種道理嚟。」
惜與堅叔度過62個寒暑的堅嬸，98年8月因心臟衰竭病逝。出殯當天，堅叔坐着輪椅，強忍淚水送老伴最後一程。如今堅叔撒手塵寰，兩人終可在天家再聚。
採訪：魯萍
全城悼念
三哥：堅叔關照後輩
一代「奸人堅」石堅前日因病逝世，圈中人對這位影視界前輩相當懷念：
三哥苗僑偉：我同堅叔合作過《天師執位》，當年佢已經一把年紀，但拍起打戲仍然好靈活。鏡頭後嘅堅叔對後輩好關照，家我對後輩嘅態度都係學堅叔嘅。
謝賢：佢係我前輩，大家都知佢近年身體唔好，表現好低調，所以冇同佢聯絡。佢當年成日拍打戲，會識得就力，從來冇打親我。佢又係好丈夫，同堅嫂好恩愛，成日見堅嫂探班。
譚詠麟：我好關心堅叔過身件事，早排演藝人協會茶敍，堅叔都有到，我仲同堅叔打招呼，佢當時精神奕奕。堅叔係好值得尊重嘅前輩，拍過好多好戲，帶畀觀眾好多娛樂。
曾志偉：80年代曾經同堅叔合作過《富貴列車》，銀幕上嘅堅叔係大奸人，但真人好和藹健談。最後一次見面，係兩年前演藝人協會定期茶敍，雖然堅叔要坐輪椅出嚟，但精神好好。
趙雅芝：好難過，拍劇時堅叔每日攞住堅嫂冲畀佢嘅咖啡，佢連整頭化妝，甚至連黐頭套都係自己嚟。
李香琴：早年同堅叔合作過經典劇《狂潮》，今日聽到佢去世消息，真係好可惜，但我知堅叔近年成日病，行動又唔方便，對佢最深印象係堅叔嘅打戲，佢真係真功夫，拳拳到肉。
唐佳和雪妮：佢年輕時係好活躍嘅人，成日出街四圍去，晚年要坐輪椅相信佢都好難過。一拍打戲佢就好投入，會好大力，但從來冇受傷。
劉家輝：我冇同堅叔合作過，但就好熟，當年關德興拍《黃飛鴻》，佢個仔石志斌已經跟劉家良做武師。我入邵氏拍戲，堅叔就入電視台拍劇，到我拍劇佢又退休。但我每年都探佢兩次，上年見佢精神仲好好。
惠英紅：堅叔退休後，我哋兩三年會見一次面，對上一次係舊年食晚飯，佢思路好清晰，只係行動唔方便。堅叔令我難忘係我當時入行，佢成日同我傾偈，問我做呢行目標同有乜打算，好似我早期經理人一樣。
李添勝：百年歸老無可避免，初期見到堅叔都好驚，因為人稱奸人堅，後來先知堅叔好親切，唔好畀佢嗰種粵語片時代奸樣而影響。
黎小田：堅叔扮奸人堅我細個睇唔少，佢真係做得入型入格，我記得好耐以前都同佢合作過粵語長片《神鵰俠侶》，佢雖然個樣生得好惡，但片場內外都對人友善。
薛家燕：我做童星已經同堅叔合作，大家睇慣佢奸人堅，其實螢幕前後兩回事，佢好好人。記得有次我哋合作《奪命刀》，劇情講佢用手捉住扮囡囡嘅我，返去我膊頭有五個手指印。堅叔為扮奸樣，我見過佢用梘水戚高眉目。