苗僑偉（三哥）噚日喺旺角出席「雅蘭大中華第128間全新形象店」開幕禮，馮仁昭以為佢係代言人，原來唔係，真正代言人係幫大會做埋司儀嘅楊洛婷，難怪佢瞓身影相，楊洛婷話：「喺咁靜嘅市道，有呢個價好難得，以六位數做一年。影咗平面廣告，會傾埋電視廣告，有冇性感瞓身演出就未知，到時先知。」
同意代言人須負責
三哥以嘉賓身份赴會，大會先後安排楊洛婷及着性感睡衣嘅洋妞同三哥喺床上合照，三哥笑住話：「拍床戲就試過，床上影相就未試過。」講到內地法例規定藝人要對自己代言嘅產品負責，三哥話：「家公司好小心研究，睇清楚先會簽代言人，如果唔係好多時只會做嘉賓。」佢又話：「我覺得藝人需要為代言產品負責，代言人要對產品認識，如果連產品都講唔出，會係個笑話，所以我以前搵代言人，都唔希望佢淨係影相，嗰時仲叫埋代言人設計。」