無綫新劇《ID精英》由入境處同電視台配合攝製，劇中ID精英個個英明神武，現實中嘅ID精英卻係另一個樣。前學運領袖項小吉來港參加悼念六四活動，ID精英揸住黑名單，二話不說閘住佢唔畀入境，扣留佢期間原來發生唔少蝦碌事件，令人啼笑皆非。
沒收手機仲要拆電池
領導人最高指示，吃飯是基本人權，所以雖然ID精英剝奪項小吉入境權，卻充份滿足佢胃口，扣留期間幫忙買外賣，送上一個飯盒同一杯奶茶。項小吉無緣入境，都可以品嚐地道港式奶茶滋味，可惜畀飽飯你食係人情，唔畀你入境就唔使講道理，飯盒可以吃剩，人卻不能留下，打回頭絕對冇情講。
民主黨議員涂謹申以代表律師身份入到機場禁區協助項小吉，據佢講，ID精英確係精靈過人，竟然以保安理由要求佢繳出手機，仲要拆除電池，當正佢係恐怖分子辦，阿涂直斥其非，表示必須保留手機以備緊急聯絡，如果入境處堅持，可以即場拘捕佢，ID精英請示上頭後，可能處長白Sir落柯打，先無奈放行。
沒收手機都未夠騎呢，ID精英仲有低能嘢，項小吉係美國公民，被扣期間要求聯絡美國領事館人員求助，點知班ID精英鬼咁醒，叻到只提供日間辦公時間電話，然而當時已經係半夜，打呢啲電話無疑把鬼，阿涂見到班ID精英咁嘅服務態度激到紮紮跳，猛鬧入境處玩嘢，因為口岸當值人員冇可能搵唔到各國駐港領事館緊急聯絡電話，推三推四諸多難留，十分離譜。
另一前學運領袖熊焱獲開綠燈，點解項小吉、高志活卻要過主呢？呢個問題，可能入境處處長白韞六先有答案，有人估計可能同熊焱抵港時，美國眾議院議長佩洛西身在香港有關，有朋自遠方來，自然要中門大開擺出開明姿態，之後佩洛西飛走，就第一時間落閘放狗。
項小吉99年曾嚟香港順利入境，當年阿涂亦曾去機場幫忙應付入境處，估唔到10年後兩人再碰頭，不過今次冇咁好彩，兩人唔可以一齊離開機場，要各行各路。
mailto:[email protected]