本來諗住繼續講吓落雨揸車有乜注意事項，不過早兩日發生嗰單童黨老笠案令到我哋班的士佬議論紛紛，講真我都好感慨，忍唔住要打尖講吓先。自問揸咗的士三十幾年，幾乎咩罪犯都遇過，由「低呢」嘅道友問攞錢、醉酒佬賴貓唔找數，到「高呢」啲嘅北姑以非禮要脅、一袋二袋貌似烏鼠人士截車等，我都遇過，大部份都係求財啫，揸的士嘅大多醒水，唔會袋太多現金喺身，全車幾嚿水畀晒佢都有限數，真係未驚過。有樣睇都叫有心理準備，但勢估唔到今時今日，連十零歲妹都要防，最慘小朋友心智未成熟，「忽」起上嚟先捅你一刀先再講嘢，又或者騰雞過頭錯手傷人，咁就唔止幾百蚊了事咁簡單喇。家啲後生係咪真係變到咁荒謬？
文：黃師傅