六四20周年，VIIV呢個「六四」羅馬數字可謂遍地開花。早前VIIV貼紙出現全港各區街頭，澳門、台灣、上海都有蹤影，着呢件Tee嘅神秘人更出現喺全球各地，包括美、加、歐洲大城市。噚日八方收到張相，赫然見到VIIV驚現天安門廣場，同毛澤東像遙遙相對。
VIIV成員同八方講，張相喺兩、三個月前影，當日北京天氣寒寒哋，相中人披住大褸去到城樓外，然後除褸影相。為咗拍到相中與毛像相對嘅構圖，佢跪喺地上面向毛像，點知有啲內地人以為佢跪老毛，竟然拍掌！不過似乎冇人發現VIIV含意，現場公安武警亦冇反應，可見內地資訊封鎖幾咁犀利。