轆Book：防護膜擋足99.9%UV　炎夏唔怕曬

早幾日又熱又曬，甫打開車門，騰騰熱氣撲臉，開足20分鐘冷氣都好難散，有時真係到連車都唔想揸。降溫方法幾萬種，今日介紹呢隻玻璃防護膜都幾巴閉，擋足99.9%紫外光兼具超勁散熱功能，猛烈陽光都變柔和SunShine。

記者：徐影龍
攝影：楊錦文
Model：Kinki@PureModels

男人慳錢　女人美白

周街都有車房幫人黐呢類防護貼，咪見平就輕易扑鎚，事關未論功效前，先要過運輸署嗰關。5月1日正式放寬汽車玻璃透光率尺度，雖然前擋風玻璃同前側車窗，依舊要求75%及70%以上透光率，但後窗及後擋風玻璃已可低至44%，好多大老闆已乘機換上較深色嘅玻璃膜，唔想好似黎天王咁成日俾人捉茶色玻璃，就要搵間信得過嘅施工商喇。
今日介紹呢隻日製玻璃薄膜，採用陶瓷物料隔熱，令到車櫳溫度比街外低5-7℃，不但開車時毋須喪吹生風先閂窗開冷氣，當街外氣溫25℃、個個流住汗行街時，你架車內櫳仍只係20℃陰陰凉，微開冷氣已足夠，耗電量同油錢已幫你慳唔少，男車主一定啱聽。至於對女士們就更重要，呢款玻璃膜可隔絕高達99.9%紫外光（UV）！平時靚太接完仔女返學放學，再出街HighTea、Shopping，一日下來足夠曬到你變鴛鴦臂，雪白肌膚留下Bra帶、背心印。有咗呢塊膜，就可以Keep住美白啦！

■酷熱夏季又熱又巉眼，揸車坐車都辛苦，隔熱擋UV嘅防護膜大派用場。

■左邊頂帽本來同樣係黑色，擺喺錶板上曬一年後變淺啡色，問你驚唔驚。

■黎天王因茶色玻璃問題，被交警捉過好多次，查小欣仲鬧佢知法犯法。

最新陶瓷隔熱科技

原來有份殺柴九嘅樵夫演員曾守明（Raymond），係代理公司嘅老闆之一。唔好噓！現實中Raymond公餘時會做輔警，仲Add緊沙展㖭。可能潛藏正氣基因，Raymond搞嘅防護膜全部攞晒認可證書，再正正經經畀錢買獨家代理權。大費周章，只因對防護膜信心十足，Raymond特別強調最值錢係薄薄一塊膜，居然分幾層結構，其中兩層Layer就係融入咗陶瓷物料，有效擋到紫外光同紅外線，而且完全不含石棉同金屬，唔會連車內訊號收發都擋埋，如GPS同Auto-Toll等，就連接收高清電視都無問題。