俗語有云本是同根生，相煎何太急？公民黨兩個大狀余若薇同湯家驊，今日會喺法庭上對壘，出現呢幕「公民黨對公民黨」嘅場面，緣於何文田豪宅賀龍居小業主與物業發展商會德豐嘅一單官司。
大狀行頭窄易對壘
話說賀龍居入伙約15年，近年大廈外牆有剝落問題，發展商會德豐將維修費用算到小業主頭上，既然係豪宅，維修費當然有番咁上下；小業主卻認為呢個安排唔公道，要求會德豐承擔，雙方講唔掂數，惟有法庭見。
小業主重金禮聘余大狀今日代表出庭，會德豐見小業主搵咗余大狀幫拖，據講不敢輕視，去搵余大狀細佬、另一資深大狀余若海出馬，然而余若海近日專心幫龔家打遺產官司，分身不暇，會德豐再搵另一位高手出馬撼余大狀。
唔知有心定巧合，會德豐最後竟然請咗公民黨另一大狀湯家驊出庭，因此法庭今日就會出現一幕「公民黨對公民黨」嘅場面。大狀行頭窄，相熟者喺庭上針鋒相對唔罕見，至於邊個勝訴，真係打過先知。