特區政府宣佈語言微調政策，實質上代表「母語教學」壽終正寢，以後不須再提。點解唔正式宣示母語教學玩完呢？點都要畀幾分薄面前朝特首高官嘅；即使係一朝天子一朝臣，唔使玩得太盡吖。
「語言微調」大大放寬咗中學教學語言之束縛，將教學語言自主權下放到校長/校管會，正是以校為本，以後政府唔會管得咁仔細，學校多啲話事權，究竟是好事還是壞事？中文中學聯會執委全體請辭，抗議新政策，咁唔妥孫公，似乎係壞事噃。左丁山與一間中中校長係老友，曾問佢是好還是壞，佢話間間學校嘅立場、背景與歷史傳統皆有不同，好難一概而論。佢話：「好似我哋咁，開宗明義話明係中文中學，創校三十餘年，宗旨不變，無論政府推行母語教學也好，推廣語言微調也好，我哋都係用母語教學嘅啦，立場前後一貫，不受新政策影響。」咁有宗旨，堅守創校精神，回報係點呢？講起就心淡，每年招生好過僅僅熟，老師盡力教學，攞過教署增值評分，但家長反應冷淡，收生成績總唔會達致到一級！香港家長其實好唔鍾意母語教學，拼命要送子女入英中，但並非所有學生都適宜接受英語教學嘅噃，一位親戚在英中任教，遵校長囑咐，用英語講書，啲學生成日瞌眼瞓，成績不佳，有一次佢嬲起嚟，大膽用廣東話講，啲學生居然識得舉手發問㖭！
一啲富有「進取心」嘅中中校長，成日想將間學校變成英中，現在有機會嘞，大可想盡辦法，在學校逐步推行英語教學，假以時日，大可將一間名義上係中中嘅學校變成實際上係用英語嘅中學。不過，前述之中中校長講：「點都係拉牛上樹嘅嘞，即管試吓嘅啫，既然政府放鬆咗語言政策，佢哋想上位就有空間啦。」何解中中聯會又有反對意見呢？有時一言難盡。如果政府講一就一，大家照跟，就冇分野，各自好做，出事可賴晒政府。但政府話各校有酌情權自主權喎，弊嘞，你做我唔做嘅話，我咪畀家長標籤咗為「不長進」，學生唔嚟？焗住要跟風，亦未必有結果，不如一開始就大家齊齊反對好過！講到尾，只要特區政府大膽宣佈推行全方位小班教學政策，十年內不殺一校，十年後只殺全校學生人數不足一百嘅初中，擔保啲反對聲音少晒。