我求大俠成日接到「借錢兄弟」或「借錢模」嘅電話，好彩我冇咁嘅需要，但我諗喺英超打滾11年嘅35歲德國中場夏文，真係要搵佢哋幫幫手。點解？事關夏文因爛賭而欠債60萬鎊（約763萬港紙），加上又冇嘢撈，真係唔知佢點還錢。
約滿曼城冇班落
之前效力過紐卡素、利物浦同埋保頓、今夏同曼城約滿嘅夏文，睇佢平時冇乜負面新聞，估唔到佢會搞到周身債。話說夏文好爛賭，但唔係淨係買「主客和」或者「波膽」咁簡單，而係玩贏得勁、輸得甘嘅點差玩法（SpreadBetting），仲喺舊年12月欠落博彩公司SportingIndex（小圖）成70.6萬鎊。佢條數喺今年1月3日到期，但係佢只係還咗10萬鎊，仲有成60萬鎊未還，搞到SportingIndex威脅要鬧上法庭。話晒夏文有頭有面，而且上到庭隨時乜到俾人挖晒出嚟，所以喺費盡唇舌後終於令SportingIndex畀多啲時間佢「籌旗」。
夏文咁講：「我哋會搵個方法解決，總之單嘢就唔會上庭。」但我求大俠就替佢擔心，佢啱啱同曼城約滿未有着落，邊度搵錢還呀！
英超球星多賭仔
英超有唔少球星都好鍾意賭錢，特別係班英格蘭仔，其中紐卡素前鋒奧雲就出名爛賭，俾英國傳媒踢爆喺00年歐國盃決賽周同領隊基瑾一齊賭啤，而且仲衰到摟埋隊友一齊賭，據聞因為曼聯前鋒朗尼欠佢70萬鎊賭債而同對方反面。至於熱刺後衞活基治，效力皇馬時喺養傷期間因為無所事事，幾乎日日賭錢，結果咁就輸咗200萬鎊。另外，外號「英超賭神」嘅車路士後衞泰利雖然賭術一流，但聽講每注至少買5,000鎊，咪話唔嚇人。
不過，外援賭錢嘅新聞就少見啲，而且仲要好似夏文咁輸咗成71萬鎊，真係好罕見。夏文之前踢過利物浦，唔知佢因賭錢而搞到周身債，同前隊友奧雲有冇關呢？
話你知
點差玩法是一種預測結果範圍的博彩方式。例如英格蘭對巴西，總入球是3球，賣價（Sell）3球及買價（Buy）5球。如果投注人士認為只入1球，那就賣（Sell）3。如果他在點差3的價位用100元買跌（即賣），結果總入球是1球，就贏200元[（3-1）x100元]。如果認為能入7球，就買（Buy）5。如在點差5的價格用100元買升（即買），最後入7球，就贏200元[（7-5）x100元]。
