自由黨四個地區支部近日改選，係甚有中共特色嘅等額選舉，四位新星包括新東方國珊、新西周永勤、九西何顯明、港島邵家輝本周一自動成功當選，所有黨員都唔使喺下星期投票，自然唔使為投票誰人費煞思量。九東一直係自由黨盲點，今年依然不設支部。
今次改選，值得一提係田二少退任九西支部主席，唔知佢日後有冇興趣去九東做開荒牛。
另一黨內焦點，係梁志偉本來想角逐新東支部主席，同方國珊較量，但最終被黨內元老搞掂。
八方聽到個小道消息，有人聲言中聯辦都好關心自由黨支部選舉，暗示不獲祝福者最好知所進退，「第二支管治隊伍」隻手伸到咁長，據聞有黨員要求黨中央跟進，澄清自由黨是否有個太上皇在西環話事。