舊年金融海嘯爆發，大型地產代理行為咗生存，只好大幅裁員同狂閂分行，中原地產主席施永青（圖）當時仲話，樓市處於冰河時期，個市有排衰；但勢估唔到樓市復原能力超強，事隔大半年，樓市成交勁旺，代理豬籠入水。中原上月佣金收入高達7.2億，係歷來次高，施永青都話自己睇錯市，估唔到個市旺成咁，仲話今個月條數有機會破埋07年10月嘅7.7億元紀錄㖭。
上月佣金歷來次高
施永青原以為呢個升浪衝埋3月就完，點知4月衝完5月再衝，佢話相信個勢未完，因市場太多錢，家存款利率咁低，100萬擺喺銀行一年，買個麪包都買唔到，所以咁多人趕住買樓。
不過，中原上月條數咁靚，都係靠祖國帶挈，因為嚟自內地嘅佣金佔五成或3.7億元，中原香港住宅及工商舖只有2.65億元，利嘉閣則約8000萬銀。