羅文、徐小鳳、肥姐、欣宜……盧海鵬統統扮得維肖維妙，這第一代扮嘢之王，夥拍林超榮主持《香港亂噏》諷刺時弊，擺明車馬把政治娛樂化，議員與官員無一倖免，一眾討論區網民熱烈支持，扮嘢風氣無疑重臨香江了，但政治卻從未娛樂化過。
記者：蒙為亮
攝影：王文忠
盧海鵬
人稱鵬哥，1973年入讀TVB第三期訓練班，早年在《歡樂今宵》以搞笑出位，在趣劇《蝦仔爹哋》裏，經常爆肚講押韻對白，令人印象最深刻，模仿羅文、徐小鳳、周啟邦等名人亦維肖維妙。
林超榮
花名超人，香港浸會學院中文系畢業，電影電視創作人，曾任無綫電視及電影編劇，作品有《笑聲救地球》、《中環英雄》、《明月照尖東》、《歷咕歷咕對對碰》及《醒獅》等。
林超榮=林
盧海鵬=鵬
第一代押韻王
林超榮最佩服盧海鵬哥的搞笑神功：「廿年前第一次拍檔，我為鵬哥寫一段反吸煙嘅稿，平平無奇幾句反吸煙對白，佢都可以讀到笑爆人個嘴。」
林：1986年我剛剛加入TVB寫稿，初初入行邊有機會編電視劇？一定由幫綜藝節目度Gag開始，記得當年有個類似東華嘅慈善Show，我負責寫一Part鬧劇劇本，鵬哥扮外國演員尤伯連納嗰個反吸煙宣傳，讀呢一句：「如果唔係食咁多煙，我就唔會肺癌死啦！」鵬哥扮得太似嘞，表情又夠趣怪，佢講完呢句對白，在場觀眾已經笑到收唔到聲，可見鵬哥搞笑功力有幾深厚。
鵬：演技一定要慢慢磨練出嚟，我訓練班畢業後，都無決定自己一定要走搞笑諧星路線，我都有試過改戲路，但太刻意反而造成反效果，漸漸地我都開始睇化，諧星就諧星啦，只要觀眾睇得開心就掂。嗰個尤伯連納Gag，我無印象，我反而記得有次扮德斯汀荷夫曼仲搞笑，無記錯應該仲係EYT年代，我記得你寫嘅稿，不過當時同李香琴、肥肥玩到忘晒形，明明有稿都仲要爆肚。
林：雖然我寫稿出身，但都明白做演員唔可以一味生記死背，最高境界係口中無對白，心中有對白，臨場爆肚先Jam得出個氣氛，今次主持《香港亂噏》，節目播出前大家會吹一輪水亂噏一陣先，正式做節目嗰陣，大家先會投入，講嘅嘢先會語帶雙關，大家先識爆肚，有埋鵬哥嘅押韻金句，當然錦上添花啦。
鵬：有咩？邊有押韻呀？哈哈，我唔係每次都刻意押韻㗎，可能後生嗰陣都有唱過戲，有啲韻腳一定記得，例如呢句：「《香港亂噏》，我話實收得！」我仲可以用不、質、塞、忽等等字眼繼續押韻。
林：同Rap、數白欖道理一樣，一理通百理明，不過就算明，可唔可以講到好似鵬哥咁好笑，呢個就係分別嘞。講到做喜劇能手，尤其扮嘢方面，我都係後輩，只可以企鵬哥側邊偷師。
扮嘢扮到收律師信
說到扮嘢之王，盧海鵬認第二，沒人敢認第一，他穿梭兩個電視台，玩盡古今中外，欣宜、小鳳姐、戈爾巴喬夫，扮誰似誰。扮足三十年的他說：「扮乜最辛苦，梗係扮女人啦。」
鵬：我無話最鍾意扮邊個，講到最鍾意，梗係扮番自己啦。最難扮係女人，太醜太過火會唔似，扮得太似又會唔好笑，扮嘢世界，最高境界係不慍不火，扮女人難在道具多，成個造型好論盡，要靠多餘服飾彌補身材不足。
林：不過我有個問題想問，點解一定要扮巨星？
鵬：其實都無話要刻意扮巨星，好多時只係工作需要。扮嘢扮咗咁多年，我可以分享一下心得，第一，唔可以詆毁人，扮嘢，唔多唔少都一定有啲醜化成份，為嘅只係博觀眾善意一笑，絕對唔可以人身攻擊。當年我扮肥肥，佢都笑住話我扮得佢醜，不過大家都明白無非為觀眾大笑一場，又何妨呢？之後嘅撻成一塊、欣宜都係一樣，不過扮籮記出現小風波，佢啲Fans不滿我扮衰偶像，搞到我收律師信，真係一世難忘。
林：扮嘢扮到收律師信，鵬哥你都算第一人咯，不過諗番起你嘅扮嘢造型同小動作都咁似，係我都會告你啦，實在太似嘞。
鵬：我同籮記好好朋友，我話要扮佢，佢借埋件衫畀我，仲話最緊要扮足啲。扮嘢都有一個大忌，就係身形唔似就點扮都唔似，想當年扮張國榮，你知啦，我邊有哥哥咁Fit呀，搞到要用膠紙黐實全身，令身形望落瘦啲，仲要邊唱邊跳《Monica》喎，幾乎氣都唞唔到，跳完Part舞我差啲暈到要入醫院，扮嘢，有時真係搵命博㗎。
林：家少咗好多扮嘢材料咯，因為扮人太辛苦，上落妝要三個鐘，仲要畀心機模仿人哋小動作，所以家走搞笑路線嗰班，都唔多注重喜劇造型扮相。想當年你同盧David、琴姐、阿燦一出場，未出聲觀眾已經拍晒手掌。
鵬：係呀，當年仲係小妹妹嘅江欣燕，扮阿梅都好神似，因為佢本身好鍾意阿梅，連啲小動作都學到十足十。我咁睇啦，帶歡樂畀觀眾係一種福氣，尤其家社會不景氣，能夠開懷大笑好重要。人係要發洩嘅，笑係最好減壓渠道，谷埋谷埋唔止精神病，乜病都出晒嚟啦！如果唔係條街都唔會有咁多鏹水彈，計我話得閒派吓笑蛋好過啦，害人害己，不如娛人娛己。
議員不等於演員
《香港亂噏》裏被揄揶的一眾人物，雖沒指名道姓，但因演員扮相的確入型入格，所以令影射成份更濃，小至議員大至特首都在被玩之列。
林：首先要澄清一樣嘢，好多朋友都話呢類諷刺時弊嘅節目，亞視製作絕無僅有，咁講法錯晒。其實早喺十年前，曾志偉同林敏驄已經有個搞笑節目，佢哋玩嘅係新華社大官，編劇個名仲叫「慕容反共」，你都咪話唔厲害！對比之下，《香港亂噏》只係小巫見大巫啦。我哋呢個節目，掛政治、民主牌頭，搞笑先係我哋主題，論政同搞笑，比重大概係一比九。如果真係要深入了解政治，睇番《頭條新聞》啦！呢兩年，我經常聽到人話政治娛樂化，我覺得根本無呢回事，大家都係有訴求想表達，只係所用方法唔同之嘛。其實大家都不知幾認真，娛樂化代表有排練過，黃毓民好明顯無背對白，因為根本無得NG，詹培忠的六四謬論係真心想講嘅，同樣何秀蘭嘅對罵同眼淚都無得假。所以我覺得，議員就係議員，根本唔係演員！
鵬：太過政治方面嘅問題，我唔太了解，但站喺香港人角度，我哋應該慶幸，唔係好多地方好似香港咁有自由度，尤其喺政治方面，呢個係一個開放社會文化應有嘅表現，不過話我老土都要講，做乜都要適可而止，更唔希望流血收場，好似台灣議會講唔夠兩句，意見不合就大打出手，咁係最差劣嘅。
林：無錯，我們嘗試喺節目搵啲Currentissue度笑位，引大家笑之餘，更希望觀眾可以學到何謂政治，其實《香港亂噏》都幾有教育意義㗎。
鵬：不過就係因為大家都掛住扮嘢太投入角色，所以度好嘅對白基本上都唔記得晒，同當年我做《歡樂今宵》一樣，開Show前一日我哋先會錄影，你知啦，家個香港變得好快㗎嘛。
林：不過鵬哥，主持呢個節目，你最辛苦係乜？
鵬：其實扮嘢唔辛苦，最辛苦係每次化妝落妝要成三個幾鐘，真係瞓完再醒，醒完再瞓都仲喺化妝間。
註：《香港亂噏》逢星期日8:30pm本港台播映
後記
盧海鵬試咪！
江湖傳聞，鵬哥當年綵排《歡樂今宵》必會試咪，他本身押韻了得，所以自創了一句：「盧海鵬試咪，X你老母X！」為了證實這風聞廿年的小道傳聞，八卦的我特意留守最後一刻，為的是見證鵬哥的這招牌金句，當鵬哥講完上聯之際，下聯出其不意的是：「拜神唔見雞。」事後為此傳聞問鵬哥，他的回覆是：「講咗廿幾年，就算係粗口都要改吓啦，無新意，講到口臭啦。」當下，我第一個感覺是喜劇之道在常新。