香港金管局總裁任志剛退休，據聞確實日期連佢自己都唔知。不過堂堂央行揸fit人，之前梗有啲消息漏出嚟。除咗香港，祖國央行副行長個位，近排都有好多消息傳出，前日來自西風嘅外電先傳出，中國人民銀行副行長易綱（圖）會調任國家外滙管理局局長，至於現任外管局局長胡曉煉就專職任人行副行長。
噚日來自北風嘅《上海證券報》引述接近央行消息人士話，易綱係兼任外管局局長，唔係調任，至於人行副行長個位會繼續坐。
新消息仲有，中金首席經濟學家哈繼銘將履新貨幣政策二司司長一職。呢個係乜嘢職位？報道話，呢個位嘅職能同貨幣政策司唔同，主要係負責人民幣國際化嘅相關問題同政策制訂。據講今年初就有傳聞話，哈繼銘係央行新司局負責人嘅熱門候選人。