古天樂、劉青雲同吳祖彥主演嘅電影《竊聽風雲》，噚日喺灣仔舉行記者會。《竊》片三位男主角飾演刑事情報科竊聽員，古仔為咗角色增肥30磅，尾段再要急速減磅，三日內極速減去20磅。
古仔減得咁成功，相信令好多想減肥嘅女士羨慕，但原來唔係咁盞㗎。講開減肥方法，古仔話其實冇餐單，佢又形容冇咁樣死去已經係萬幸，佢話：「角色講我後段有絕症，要突然間暴瘦，原先導演想我減30磅，但係用盡方法最後都係減得20磅，我嘅方法係唔食只飲，每6個鐘就跑步兩個鐘，連續做足三日，咁樣做唔死都算夠運。」馮仁昭奉勸各位女士唔好照辦煮碗囉。
吳彥祖避談Edison
至於被指因MaggieQ而同Edison失和嘅吳彥祖，被問到點睇Edison為淫照事件解畫一事，佢就唔多想講，佢話：「我唔知佢返嚟，對佢嘅事冇睇法，件事過咗咁耐啦。」再問佢對Edison回港發展有何意見？佢話：「呢啲事自己搞掂，唔關我睇法，唔關好多人嘅事。」