「Hello，可唔可以請你飲杯Cappuccino？」陳豪呢句廣告對白呢幾個星期Hit到爆，原來車壇中都有Cappuccino，仲要係絕版貨，無論原裝抑或改裝，要搵部齊料又靚仔嘅都係超難，所以話就算你想試都未必一定試得到。不過我哋就有本事，一口氣搵嚟超靚仔原裝版及激改升級版Cappuccino畀大家過吓癮！
記者：梁美甜
攝影：陳陶鈞
鳴謝：日本絕版車會
原味小巧跑得
Cappuccino乃日本本土現今依然勁Hit嘅小車，660cc屬K-car細車仔，偈細唔代表無得發圍，由於引擎搭配渦輪增壓，起步加速反應快而利落。呢部93年原裝Cappuccino，除車漆由原來的鴨屎綠換上430拉利灰之外，基本上全車都係原廠。事關車主喺93年由香港代理手上買下，零手齊料靚仔到暈，香港二手市場上都幾難搵得到背景相若嘅同款車型。何以Cappuccino如此受車迷歡迎？在場幾位車迷認為，呢部車仔以賽車為設計藍本，前後比例為50:50，外形特別又多嘢玩。的確，Cappuccino以K-car小跑登場，車仔細細卻能兼備多種跑格，車頂可以變化出T字頂、Targa頂以及全開篷，糅合Coupe、Convertible玩味，大前提係全手動，你唔係天真到以為係電動硬頂開合吧！
升級多花臣
Cappuccino另一引人入勝之處就係勁多嘢玩，換句話講或者會更清楚，就係可以激改，好似另一部94年白色肌肉型升級版就係全港絕無僅有之作。由全車大包圍連尾擾流、引擎、紅色內櫳連桶椅、高級音響系統等等，幾乎除咗原有嘅神韻外，乜都改，可見改裝空間之大，無論係鍾意改裝外觀抑或係提升性能馬力，呢部小車似乎唔多識托手踭，惟大多配件要由日本訂購，價錢偏高，無番咁上下本錢都未必可以「玩」得起，不過借用車迷一句：「鍾意唔係用錢衡量，就算窮到得番一粒米，都會畀半粒米佢（部車）。」
當年車價18萬
由鈴木生產嘅Cappuccino，生產線壽命短暫，由91至98年大約8年時間，於93至95年間香港代理亦有引入，為數唔多，大約五六十部左右，由於當時車價要成18萬一部，唔係人人負擔得來Hit唔起就自然停止入貨。大多Cappuccino都輸往英國，時至今日，日本本土及英國揸呢部小車依然大有人在。車仔只得兩個位，要試「味」，就只係可以二人世界慢慢嗒。