引起全城熱話嘅無綫劇《巾幗梟雄》上星期光榮落幕，但仍有唔少是非餘波，當中二奶奶商天娥被指同劇中演員不和，仲有指佢擺款教其他演員做戲。前晚播出嘅《星星同學會》中，大奶奶謝雪心同三奶奶惠英紅被問及呢件事，佢哋坦承娥姐有教戲，娥姐即時露出尷尬神情，之後仲作狀扮喊解圍。
預告辭演新劇
娥姐前晚喺將軍澳電視廣播城拍攝新劇《掌上明珠》，同場仲有宣萱同滕麗名等，對於上周冇出席「巾幗梟雄會」活動，娥姐就解釋：「我當日因為拍《掌》劇，點知因為落雨，所以搞到延遲晒去唔到。」不過同場嘅林保怡亦表示同娥姐合作好難，佢話：「我意思話佢係前輩，搞到我演出時都有緊張，所以NG在所難免，娥姐真係好專業。」
此外，對於製作資源部總監樂易玲話希望《巾》劇原班人馬再開劇，被指麻煩多多嘅娥姐似乎唔多雀躍，佢話：「9月我要開工，未必得閒，其實有冇預我㗎？」連樂易玲開到聲都敢唔答應，呢位二奶奶認真斗膽。