早兩日連場大雨，少人出街的士自不然無啖好食。生意事小，不時見到馬路上有小炒或大撞仲令人擔心，睇嚟好多時都係因為啲司機經驗不足，尤其啲SundayDriver，遇着突發性暴雨，好多都會手忙腳亂。今日不如就借呢個發噏風時間，同大家分享一下雨天揸車嘅心得。最常困擾新手嘅，就係高速公路上排唔切雨水，令到架車有點浮起嘅感覺，好易過線都不自知。無信心就最好Keep住中線行，因一般道路或天橋，設計上中間位會稍高，務求雨水向兩邊流走，所以行快線或慢線，都好易被積水影響行車穩定。行車時除保持安全車速、留意路面行車線外，亦要刻意揸實軚盤，免受水氹影響而搶軚，遇着隔籬線濺起大量水花，亦要冷靜，唔好因嚇親而下意識扭軚。
文：黃師傅