【澳門直擊】金沙財困叫停澳門路氹工程，賭王兒子何猷龍投資的大型娛樂度假村新濠天地昨日卻盛大開幕。何家二房齊心唱旺，賭王開口hardsell，超儀就低胸撐場。
何猷龍旗下、據指投資超過20億美元（約155億港元）的澳門新濠天地，昨日正式開幕，吸引了不少名人紅星捧場。傍晚何猷龍以新濠博亞娛樂聯席主席身份，拖住太太羅秀茵恩愛行紅地毯，其父賭王何鴻燊、家姐超瓊、超儀（Josie）等都盛裝支持，但就不見賭王三、四房成員。
賭王hardsell力撐說：「佢好乖仔！大家好，香港澳門都好，博彩業更好，國家更強，我一路都話睇好澳門啦！」Josie一身RueduMail新裝，她說：「今日捧細佬場，好欣賞呢度。」會否在此開騷？她即說：「當然好啦，呢度hardrock（酒店）喎，啱我style呀。」她笑言不收酬金都有商量。07年底，何超瓊有份投資的美高梅金殿開幕，超儀被蔡依林飲頭啖湯，成為首個登台歌手，昨晚開幕VIP晚宴，表演嘉賓又落到陳奕迅（Eason）手上。
Eason三語獻唱
Eason在台灣剛開完演唱會，昨晚趕去澳門做VIP晚宴表演嘉賓，他說：「都有啲擔心，因為去得太盡，把聲有啲沙沙哋。今日揀咗4首歌，包晒三國語言，英文、國語、廣東話，因為啲guests嚟自世界各地，好期待！」他謂稍後會和朋友家人一齊去玩，但不熱衷賭錢。Eason台灣演唱會被要求除褲，他笑住說：「唔好喇，我身材又唔係特別好。」有陰影？他說：「係呀，唔好亂嚟。」
採訪：LawWaiMan
攝影：RickyIp
