巴塞隆拿今季威到盡，成為西班牙首支「3冠王」，同屬西甲班霸嘅皇家馬德里，就差唔多成季都俾巴塞「恰死」。皇馬高層上下心諗，新球季唔發威真係勢係假，6月頭佢哋就作出重建第一步，佩雷斯再度出任新主席，以佢之前建立銀河艦隊嘅作風，呢股「銀河旋風」肯定令今個暑假轉會市場風起雲湧。
比歷連奴將任教練
截至5月31日嘅報名限期，只得佩雷斯一人競選主席，喺無對手嘅情況下，佩雷斯無風無浪繼00至06年，再度出掌皇馬，周一仲喺巴拿比奴球場見傳媒。佩雷斯一上任就好有計劃，據西班牙《阿斯報》報道，佢已有3大部署，前阿根廷國腳華丹奴，將接手米積杜域嘅體育總監位置，負責球員買賣，又搵施丹做顧問。
至於拉莫斯嘅教練合約只到今季，加上季尾戰績差勁，輸畀奧沙辛拿後錄得5連敗，佢嘅位置將由現任維拉利爾教練比歷連奴接手，呢位智利教頭唔少嘢，一手打造黃色潛艇由鄉村球會，變成歐聯常客。據報比歷連奴同維拉利爾仲有合約，原本離隊要賠400萬歐元（約4,400萬港元），但皇馬想慳錢收購其他球員，可能送上德倫特等「剩餘物資」作代價。
勢清洗荷蘭幫
最後一個部署就更厲害，就係世足球先生卡卡將由AC米蘭加盟，據報最快可喺周四成事，皇馬就支付6,500萬歐元（約7.1億港元）轉會費。我求大俠就對呢個部署有啲懷疑，事關AC剛剛由李安納度接任教練，佢可以講一手帶大卡卡，打感情牌嘅話，未必留唔住卡卡。不過「佩雷斯的名單」又點止卡卡一個，C朗、列貝利、伊巴謙莫域等，只要有頭有面嘅攻擊球員，暑假點都會同皇馬拉上關係。
有入就梗有出，前朝球員，尤其係荷蘭幫勢成大清洗目標，又老又傷嘅雲尼斯達萊、今季加盟後冇咩建樹嘅雲達華治都預計要離隊。魯爾之前就同佩雷斯有心病，隊長地位隨時都危危乎。