柴九話齋，人生有幾多個十年？做人最緊要活得磊落。有良心嘅香港人就係要大大聲聲咁叫平反六四先痛快，否則前日點會有8,000人上街？偏偏有啲人一聽到「六四」就黐起條筋，早前《君子》雜誌香港版嘅高層懷疑患上六四敏感症，失驚無神抽起今期個六四專輯。有網民睇唔過眼，直斥南華傳媒自我審查，變咗做偽君子雜誌，發動網友寫電郵去美國Hearst集團（mailto:[email protected]），要求收番個大中華地區出版權。
網民寸爆扮君子
香港傳媒避談六四，旺旺台同CCTVB已經有辦你睇，最近連《君子雜誌》6月號都加入呢個大家庭，臨時抽起第143至156頁嘅六四專題報道，高層所持理由係內容「煽動」，搞到為呢個專題出心出力嘅一班編採人員好沮喪。
不過，有網民準備繼續跟進，除咗發動大家寫信去美國篤南華傳媒自我審查呢單嘢，YouTube更有一段片，將呢個不見天日嘅報道事件重演，寸爆有人偽君子扮君子 http://www.youtube.com/watch?v=u59cN6zr3i8。
毛孟靜係呢個六四專輯嘅受訪者之一，對報道最後未能出街都好疑惑。MissMo記得負責採訪嘅記者搭上搭搵佢做訪問時誠意十足，三個鐘頭大家都互相抒發六四感受；由於係上海同鄉，講得興起都會加上兩句上海話，大家啱傾到差啲唔想走。
事後嗰位記者親自打電話畀MissMo，訴說老細一聲令下就抽走報道。MissMo記得當日講嘅六四問題都好soft，好似閒話家常咁話當年，除咗講咗句支持平反六四，搵唔到邊度會好煽動？所以佢勸嗰位記者要堅持落去，更叫記協出手相助，主動出面揭破偽君子真面目。
八方噚日再次向呢本雜誌查詢事件，可惜繼續無回音。
mailto:[email protected]