30秒做得乜？答案係打機兼過版！玩過咁多電玩遊戲，要限時過關都唔少，不過急到每次都要30秒內完成，又真係少之又少，這種玩法仲成為這款PSP遊戲《勇者30》賣點；雖然話係30秒過關，但遊戲有分為RPG、射擊、策略同動作元素，既考驗反應，更要挑戰腦筋靈活。
記者：許福合
四大難關
PSP同NDS遊戲最大差異，前者追求畫面質素，後者着重趣味性，畫面美觀與否就見仁見智。PSP這款《勇者30》算係一個異種，遊戲內容有如NDS遊戲，畫面一般，但勝在遊戲性高，讓玩家有重拾完成任務、過版一刻嘅感動！遊戲無論從畫面到配樂都係復刻設計，機齡有番咁上下，玩落份外回味！遊戲開始可選擇4大類型，主要分為RPG、射擊、策略同動作，而每一模式皆會代入一名角色進行遊戲，過程中會考驗玩家腦筋，當然！反應要快亦不能缺少。
30秒的RPG
對角色扮演RPG嘅印象，都係要慢慢煲，練等級收集裝備；但《勇者30》就反其道而行，任何任務、每一關、每一排都要你限時30秒完成，真係RPG的創新體驗！故事背景玩懷古，仲扮晒老老土土！話說有個大魔王侵略人界，勇者要去挑戰云云；30秒內升級到打敗魔王當然不夠用，不過在RPG世界，不可能都可變可能，因為當中會出現時光女神，法力強大到可以暫停時間，甚至回溯倒流，玩家要考慮如何利用時光女神嘅幫助，在「時間」內成功升級再去打王。打Boss時主要用撞擊，將魔王撞走就勝出，不過要留意打王時，時間會持續倒數，真係會玩到一手汗㗎！
反應智力兼備
RPG玩法唔啱你杯茶？遊戲內還有「公主30」，以射擊遊戲方法進行！畫面睇落似足橫向動作，玩法是在30秒內避過障礙，取得物品後再回城；而公主身邊會有衞兵，如被魔兵殺光、公主跌落馬就GameOver！玩這關重點係地形及攻擊節奏，好彩攻擊時可長按作連射，否則必定手軟，另外打倒怪物後掉下嘅金錢，可購買更多衞兵提升攻擊力。遊戲還有扮演騎士嘅「騎士30」及策略型嘅「魔王30」，需要玩家充份配合反應、策略及機智去衝關。此外遊戲更支援AdHoc連線，最多可讓4人連線對戰，鬥足30秒。
Profile
主機：PSP
廠商：Marvelous
遊戲類型：角色扮演
遊戲人數：1人
售價：約$360
