世界上，凡有涉及政治或名利之事，就有意想不到之爭鋒呷醋風波，難以避免。聽講明天立法會就有李華明議員對有關金管局總裁繼任人選一事提出嚴厲質詢，在六四前夕給曾特首難看。在本港有限之talentpool（人才庫）中選一位北京香港皆可接受之人選，且有豐富金管局經驗者，陳德霖當然係最佳一位，但因為佢做咗特首辦之後，政治上多咗不少敵人，無論點講都會有人反對佢嘅嘞。
為政治而反對上佳人選，天下普遍如是。奧巴馬提名一位拉丁裔女性聯邦上訴庭法官出任最高法院法官，選人諗到絕。合乎（一）女性，女人不會反對；（二）第一位拉丁裔，講西班牙話之美國人一致歡呼；（三）學歷一流，普林斯頓畢業生，成績卓越，畢業攞summacumlaude，入耶魯法學院，係法律學報編輯，學業成績優秀到極；（四）八歲患上糖尿病，九歲喪父，母親獨力照顧一家，住在紐約公屋，出身貧苦，賺人熱淚；（五）咁樣看背景，可以入最大律師行賺大錢，但佢做咗幾年私人律師後就入政府做檢控官，後來做法官，視華爾街錢財如糞土。奧巴馬搵咁勁嘅人做最高法院法官，冇人敢反對喇啩？錯了，因為這位女法官傾向自由派，講過上訴庭法官可以係人民之包青天，係制訂公共政策之一個環節，可以透過個人法律意見，改善社會不平等。呢一套當然與保守派之意見不同，於是這位SoniaSotomayor法官要準備打仗，白宮成立專責小組為佢護航，加強訓練（為佢提供大量長時間模擬參議院質詢），不敢掉以輕心。
唔講政治只講名譽，爭鬥同樣激烈，有失斯文。牛津大學自1708年起，就有選舉詩學講座教授傳統，五年一任，到咗二十一世紀嘞，呢個詩學泰斗寶座嘅薪酬認真可笑，只得年薪一萬一千鎊，如無其他收入，教授不知如何生活，但工作就好輕巧啫，一年到頭只須公開演講三次。今年有三位詩人競選喎，七十五歲之男詩人DerekWalcott被指自1982起年不斷性騷擾學生，於是退選，由一位女詩人RuthPadel勝出，誰不知Padel正是發匿名電郵抹黑Walcott之人，你話幾有失斯文呢！事發後，Padel於5月25日辭任。由法官、政客以至英國頂級詩人，凡涉及名位，無不鬥餐死！以今日時勢，邊個想接任志剛的棒，都要先捱幾刀。