潮流興環保、節約，老公於是乎借勢話我唔夠In唔識環保唔識慳，尤其係電油錢更係好似開水喉咁，一聽無明火起，話我大使我都認，居然話我唔潮唔In呢下簡直係侮辱。即時撥個輪搵女友人個高級駕駛協會會員老公過幾招，前提當然係簡單容易把握嘅招式，誓要喺老公面前挽回「飛屎」。
老友即時過料，慳油最簡單係識用扭力。又唔係上山玩Off-road，點知部車係咩扭力啫！「睇規格表咪知囉。哈！哈！」係，跟住呢？「總之唔好經常突然加速，亦唔好遲煞車，咁樣好耗油；好多新車偈都調校到偏向低轉數就輸出大扭力，即是踩少少油就已經俾『夠』車速，唔使狂踩又或者大力踩……」知道喇！「另外，尾箱唔好放太多無謂物件、Keep住適當胎壓等，仲有一招最啱老婆同你班太太團，就係用油公司優惠油卡。」係，大家最唔怕身懷多卡，申請多幾張油公司優惠油卡，唔使專登走幾轉搵指定牌子或者行寃枉路搵特定油站，唔錯！
文：大姨媽