大學舉行晚宴，碰到前局長L，左丁山對佢講：「無官一身輕，你現在好似好輕鬆喎？」前局長L乃外科教授，每星期六到中大教一次書，算係兼職，教完書就到馬會會所凱旋廳飲茶，十分輕鬆；久唔久就會見到曾特首與家人在此飲茶，輕裝上陣，永遠坐同一張枱，刻意低調，人人識趣唔會騷擾之。教授L嘅飲茶時間在下課後，所以次次差少少，與特首互相好少會碰頭。
教授L坐在議員C附近，左丁山笑佢：「家大家唔使對罵啦？」教授L話：「我哋邊會鬧交呀，意見不同梗係要溝通吓嘅啦！」後來兩人越坐越埋，直情咬耳仔咁款，唔知幾好傾，總之離開議會，便是朋友，譬如議員W在立法會講到青筋畢現，咬牙切齒，七情上面，在晚宴上穿筆挺西裝，談吐斯文到極，回復教授mode，幾有料呀，問佢點解激到曾特首爆肚，議員W話：「唔明喎，六四嘅標準答案，佢應該背熟二十次㗎啦，點解爆肚嚟明益我哋，真係唔知點解。」
議員C此日得中大榮譽院士銜，晚上宴會中，佢邀請咗好幾位昔年同窗友好出席，原來幾位都係同佢一齊編學生報或搞學運或辦社會活動，甚至幫忙競選嘅，可講得係多年戰友。問佢哋對現在學生報有何觀感，其中一位編輯話：「因時代不同，內容唔好講嘞，我哋三十年前認為重要之事，今日學生可能認為唔重要。如果講編排形式等等，我哋就追唔上時代，唔識欣賞嘞。」講起形式，左丁山個幾月前睇過一份學生報，發覺五顏六色，一眼望落去，有頭暈眼花感覺，大概日日睇慣《蘋果日報》之編排乾淨利落，或《信報》之古老穩重，突然間揸住份中大學生報嚟睇，淨係啲外表編排已將左丁山趕走，此之謂代溝也。年紀大咗，個人思想係會唔同嘅，譬如議員C之思維與行動，早與大學時期明顯不同，隨着時代而不斷漸變，適應新社會需求，先至有今日成就。有啲人以為自己講原則，抱住三四十年前讀書嗰套，時至今日，到咗退休之年，行動行為仍然似學生領袖，係擇善固執吖還是永不成長，是但你講。