行會召集人梁振英選特首之心路人皆見，而且仲頻頻做嘢，另一大熱唐唐只可以望住人哋積極拉票，唔心急就假。前日佢難得獲民建聯邀請，山長水遠去到深圳參加佢哋嘅路向營，除咗講政府同民記合作關係，梗係要講番啲自身嘅嘢先至抵！
有與會者話唐唐喺會上提到，民建聯應該同政府榮辱與共，但家俾人嘅感覺，就似乎唔係太似一個執政聯盟，言下之意都係覺得民記同政府咁friend，應該多啲撐政府。唐唐更加特別提到，民建聯喺選委會有一定影響力，下次特首選舉，應該搵番個志同道合嘅候選人合作。唔少黨員都覺得唐唐講得幾「白」，好難唔懷疑唐唐係提早向佢哋示好，快過振英哥向民建聯拉票。