5月真係勁，只要你有貨喺手，不論股票、外幣、商品，都係升到甩轆，唯一唔得就係啲長債，同有異曲同工之效嘅公用股例如中電（002）。禮拜六我哋《蘋果日報》財經版都係以「港股35年來最牛5月」做頭版頭條。35年前，即1974年，孫柏文都未出世。
港股喺5月升咗17%，淨係買恒指牛證都發達。不過大家知唔知，原來有隻商品喺5月嘅升幅不但贏晒其他商品，仲要贏埋恒指？呢隻商品就係白銀，升咗27%，作為白銀戰隊隊長嘅我，當然鼓舞。
央行失控 白銀狂升
咁點解啲白銀咁勁？咪就要多謝以花旗國聯儲局為首嘅紙幣狂魔，開始被圍剿囉。甚至可以話市場開始炒「央行失控概念」。
咩係「央行失控概念」？咪就係央行做唔到想做嘅嘢，或做咗想做嘅嘢，不過不但攞唔到想要嘅結果，仲越做越有反效果。
央行想做啲乜？咪就係㩒低長息，令啲借長錢嘅人例如買樓人士，更有意欲去買嘢托市。
點知喺上個禮拜，債券市場參與者已出現「食唔落」現象。喺供過於求嘅情況之下，長債價不斷下跌，令長債息率係咁上。花旗政府喺上個禮拜發嘅新債數量雖然高，不過喺萬億財赤嘅世界算平常，之後至少一年個個禮拜都會係咁。
㩒低長息 事與願違
聯儲局其實已預料到會唔夠買家，所以早前3月18日宣佈，會印3000億美元自己買，即「量化寬鬆政策」。佢話啲錢夠用6個月，呢個冇錯，不過佢冇講嘅就係唔加碼利息就係咁升。
伯南克都唔知自己有咩棋可以行，債王BillGross仲話如要平息債市嘅不滿，惟有出年初就開始加息。
加息？得咩？仲唔令人覺得佢哋已失控？
孫柏文
http://phatdat.blogspot.com