台灣富商、鴻海集團董事長郭台銘4月再做老竇，佢同老婆曾馨瑩（狗狗）嘅女兒郭曉如（妞妞）前日滿月，但郭台銘冇為囡囡擺滿月酒，改為分送台灣習俗嘅油飯同捐錢做善事。
狗狗火速收身
坐月期滿、恢復「自由」嘅狗狗，產後火速收身成功，仲可以着未生BB前嘅緊身牛仔褲，大前日佢急不及待出街逛書店解悶。郭台銘前日傍晚則帶埋妻女，去咗士林官邸享受天倫樂，抱住囡囡去街嘅郭台銘心情大好，唔捨得將囡囡放喺BB車上，要親自抱囡囡。郭台銘一家由助理、菲傭揸機，喺官邸拍攝全家福，不過郭台銘抱囡囡抱到手軟，越抱越低，影完相，先捨得將囡囡放入BB車，推車時更邊走邊哼搖籃曲。
身邊嘅狗狗就盛讚郭台銘係100分好爸爸。對於狗狗火速收身，郭台銘話：「當然會心痛，但她僅靠飲食和運動而已。」狗狗就話：「離我理想體重還差4公斤（約9磅）啦！」
其間不斷有市民要求合照同握手，有女萬事足嘅郭台銘更公開宣揚佢嘅「增產報國論」，大聲疾呼：「台灣人口實在太少，大家要多生一點。」