全城政界熱搶趙紫陽回憶錄《改革歷程》，公民黨湯家驊都係其中一員。佢算係好彩嗰一群，事關幾經辛苦之後都搵到一本，唔使繼續望穿秋水。湯大狀近日都係咪緊呢本書，佢喺自己網誌話，自己一書在手後，最先睇嘅就係趙紫陽喺89年5月4日嘅發言以及佢喺5月19日喺天安門廣場嘅講話。
睇完之後，湯大狀真係百般滋味在心頭，佢引述趙紫陽話，一切問題都應該透過對話交流解決，可惜當權者往往認為呢個只係無權者嘅夢想，仲不時將無權者描述為反對派、搞亂者、破壞者以及種種莫須有罪名，點解呢個都係古今中外嘅定律？唔知係咪都戥家陣班民主派唔抵？可惜湯大狀噚日有事未能參與六四遊行，但燭光集會就一定現身。