金融海嘯下，員工想老細派花紅可謂緣木求魚，英國電訊商Vodafone（VOD）就因為呢家嘢而撞板。事緣VOD管理層喺員工薪酬上出爾反爾，原先話唔派花紅，點知兩個月後竟然轉軚派番。雖然佢係反口，但員工就有錢落袋。
早喺3月，VOD行政總裁GuyLaurence同員工講，今年冇花紅派兼且要凍薪，原因同表現無關，就咁激嬲咗一萬名員工。不過，上星期四，Laurence發咗份內部通知畀員工，話要同佢哋分享一啲「大家會有興趣嘅好消息」，大意係話集團派番花紅，金額係人工嘅2%，會喺6月收到。
佢解釋話，公司要大刀闊斧改革，而佢哋又見到員工擁抱改革，所以要獎勵員工，同時亦要多謝佢哋舊年為公司出力。
有內幕人士話，3月時話唔派花紅，令員工士氣大損，員工指公司雖然盈利下跌，但稅前盈利都仲有41億英鎊（514.6億港元），今次重派花紅係「常識」（commonsense）嘅勝利。