銅鑼灣區噚日人山人海，好多市民都去維園響應支聯會舉辦嘅六四遊行。同樣喺港島區，幾個有基督教信仰嘅局長就去咗大球場參加全球祈禱日。誰不知，大球場裏面一樣有基督徒高舉橫額，為六四死難者同天安門母親禱告，指班政府高官冇公義同混淆視聽，祈禱都冇用。
全球祈禱日對基督徒嚟講係一件大事，過程仲會轉播到全球數以億計人收看。律政司司長黃仁龍、政制及內地事務局局長林瑞麟、保安局局長李少光同環境局局長邱騰華都係虔誠基督徒，當然有出席呢個一年一度嘅大型禱告會。
批評班高官罔顧公義
班局長講明要為特區政府向上帝禱告，佢哋心裏面有乜嘢願望，八方不得而知，但以煲呔為首嘅特區政府呢期最大嘅願望係乜，斷估都唔會祈望更多民運人士闖關，反而希望禮拜四晚打風落雨，少啲市民出席嗰晚個燭光集會就大有可能。
原本個活動純粹係宗教活動，點知當李少光同林D9行出中央草地，代表香港政府祈禱時即刻出事。林D9發表禱文時，看台上面有大約十個基督徒突然企起身，分別將兩張悼念六四嘅橫額揚出嚟，吸引晒全場目光，一如平時，已經冇人聽到D9講緊乜嘢。
睇真一啲，原來又係煲呔惹嘅禍，班請願人士自稱「曾蔭權不代表我基督徒聯盟」，佢哋要求係為六四死難者同天安門母親禱告，順便為2012雙普選祝福。呢班自發走埋一齊嘅基督徒仲希望，可以改革教會某一撮人嘅偽善擦鞋文化，批評班高官表面誠心為香港祈福，但係喺現實中又罔顧公義，做埋啲混淆視聽、掩飾真相嘅行為。
呢班請願嘅基督徒自然難逃被保安員請離場嘅命運。已經離開政府嘅前商務及經濟發展局局長馬時亨，負責籌備噚日個祈禱日，佢衝去同班示威基督徒理論，佢話明白人人都有表達意見自由，但係覺得唔係咁適合喺呢個場合「搞事」。
一班高官顯得相當無奈。原本為特區政府祈禱，點知喺呢個宗教場合無端端又惹起一番六四爭議，呢鋪真係多得虔誠教徒煲呔唔少。
mailto:[email protected]