好多人都話金融海嘯下，各行各業難搵工，其中金融業首當其衝，之但係，香港唔少股壇名嘴要轉工似乎冇乜難度。好似噚日黃敏碩Michael就通知華華，話佢已經由信達國際（111）轉咗去做康宏證券及資產管理董事，今個月初正式返工，以後會喺鰂魚涌出沒。
Michael話，佢之前因為工作關係，識得新公司部份管理層，而新公司原先做理財為主，今年會擴展到投資、證券、網上基金交易等業務，符合家通才嘅理念，佢可以將佢做開嘅證券投資分析帶入新公司，覺得有空間配合，所以轉工咁話喎！
市況好轉訊號？
當然，逆市下轉工唔易，要升職加薪就更加難。Michael話新職銜都一樣係董事，至於人工，佢話有增加，係「合理調整」，不過佢今次轉工嘅考慮，其實人工行後，新工作領域行先，因為新公司呢幾年客戶增長快，將來會多元化發展，佢覺得新工較有挑戰性。
華華記得，無幾耐之前，股壇名嘴有黃偉康轉咗去敦沛做董事總經理，沈大師沈振盈返去訊滙做CEO；基金界方面，亦有謝李婉雯過檔做大摩亞洲區銷售及市場部阿頭。究竟呢一連串嘅過檔挖角只係「個別事件」，定係金融機構已經開始招兵買馬、係市況好轉嘅訊號呢？咁就真係要放長雙眼睇睇嘞。
李華華
mailto:[email protected]