由二十年前在電台合作《三個小神仙》，到現在nowTV同「台」吃飯，鄭丹瑞與林珊珊恍如連體嬰。雖然兩人高度相差一呎有多，但這一呎卻涵蓋很多共同點，兩人有仔有女、愛人同是白羊座、在娛樂圈歷盡千帆依然有同一條快樂方程式──愛家人！
記者：蒙為亮
攝影：伍慶泉
鳴謝：GUGUCAFE（28950019）
查詢：http://www.now.com.hk
鄭丹瑞
聲演香港電台廣播劇《小男人周記》男主角阿寬，成為小男人代表，後加入無綫主持《十大勁歌金曲頒獎典禮》等節目，《金牙大狀》是其電視劇代表作，1993年推出唱片《給最愛女兒的說話》，《那夜我替女兒「R」背脊》一曲令其慈父形象深入民心。
林珊珊
與鄭丹瑞、何嘉麗主持《三個小神仙》為人熟識，曾當歌手及拍電影，九十年代轉做幕後，1995年任BMG唱片公司市務總監，現開設LambProductionLimited，旗下藝人包括鄭伊健、草蜢、林曉峰及康子妮等。
廿年「主僕」關係
二十年前是電台盛世，不少人收音機不離身，二十四小時由朝聽到晚。透過收音機，聽眾與DJ透過大氣電波成為好友，同台做節目，DJ與DJ之間也變成推心置腹好拍檔，林珊珊：「與其要我讚阿蛋點叻，倒不如講講佢呢廿年嚟嘅轉變仲好啦。」
鄭丹瑞=鄭
林珊珊=林
記者=記
林：阿蛋好厲害，廿年嚟個樣都無乜點變，唯一變嘅係佢豪爽咗囉。知唔知呀，我識佢廿年，未受過佢一飯之恩，上年同枱食飯先屈到佢請番餐，伊健當時都在場，全枱人都叫阿蛋請，伊健都好交戲，慢一慢攞銀包扮找數，最後佢先被迫就犯。
鄭：好彩，你都算有良心，識得講個「屈」字。家嘅林珊珊，我真係好陌生，以前同佢做節目《三個小神仙》，佢成日唔用腦，蠢到死又任性，哈哈，佢家叻咗好多咯。
林：有乜辦法先？你咁叻乜都諗好晒。過咗咁耐先講吖，以前做節目真係唔使點用腦，阿蛋乜都準備好晒，每日都有預備定張格仔紙畀我，我睇完張紙就知道講乜，就可以開Show；何嘉麗呢？連Panel都控制埋，我揀吓CD寫吓Copyright就一日，幾輕鬆呀！所以我一向都稱呼阿蛋做「主人」，叫咗廿幾年都改唔到口。
記：現階段，你哋最喜歡邊個身份？主持人、經理人定創作人？
鄭：我講先啦，我會揀做創作人，我份人唔可以正正經經坐Office九個鐘，我鍾意喺出面街逛吓逛吓，喺快餐店或者酒吧，我都寫到稿寫到劇本。創作人呢個身份，退休後我都會繼續做。
林：由做電台節目開始，我已經知自己係個鍾意做文書工作嘅人，所以順理成章由幕前做到幕後，由唱歌做到藝人管理。咁又唔代表我唔做幕前工作嘅，不過會揀啲自己鍾意做嘅工作囉，就好似《HaveaNiceDay》，之前唔使點預備，每星期約班舊同學hightea，大家傾偈交流心得，唔使三分鐘就有齊美容飲食資訊，大家都係用家，講起嚟特別有親切感，呢個節目根本係女人仔小天地。
鄭：珊珊呢啲咪叫蠢人有蠢福囉，我乜都要做，又拍劇又搞舞台劇又寫劇本，佢就可以揀嘢做，真係好。
林：哈哈。
鄭：同珊珊合作咁耐，好多嘢無得計，尤其係錢，邊個收多邊個收少算罷啦，我對佢100%信任，所有幕後工作交晒畀佢，有佢我完全放心，如果邊個收多咗，咪食咗佢囉。
林：係我又唔拘呀！我都話阿蛋呢廿年嚟最大轉變，係變得越來越豪㗎啦。
機會從來不等人
由創作青年變成現在的創作中年，阿蛋創作力依然驚人，下月底將夥拍黃真真逆市開愛情小品電影。搞創作，最怕被人批評落伍老土、跟不上時代、不懂現代潮語，現年54歲的阿蛋：「不論心境同Idea，我都不知幾潮。」
鄭：我做咗咁多年創作，就算當年喺商台做營運總監都係呢句：「同步呼吸。」所謂同步呼吸，就係要多啲貼近年輕人，令自己唔脫節。要In其實唔難，只要保持心態常新，唔好一味回望往昔點好點好就得嘞。如果我淨係識睇番《小男人周記》有幾風光，我死得啦，唔向前看，只會令自己不斷落後。
林：我直頭覺得後生仔係你生活動力啦，講真，阿蛋你湊仔確有一手，我自愧不如，尤其你做嗰個節目《快樂的Egg》，玩埋Schooltour，你都算有心有力。
鄭：同後生仔做嘢傾偈係樂事，以往我去中學同大學做Schooltour不收分文，家我象徵式都要收一蚊，你畀幾多我收幾多，我收錢，係想話畀年輕人知呢個世界無不勞而獲。每一集，我會連同三位學生一齊出動，專訪問啲後生時已經對香港社會有貢獻嘅人，例如設計師楊志超、作詞人林夕等，希望培養佢哋一份社會承擔感，同時替觀眾注入正能量。我覺得大家對後生仔太多誤解，少咗份欣賞，其實家啲後生仔，都唔係想像中咁飯來張口。
林：家啲後生仔的確太幸福咯，爸爸媽媽畀晒最好嘅嘢，佢哋根本被寵大，呢個係我對現今一代嘅看法。我哋以前邊有呢支歌仔唱，尤其啱啱出嚟社會做事，乜都去學、去做，唔怕蝕底……
鄭：我都有樣嘢想鬧吓佢哋，話知你幾有創意，有機會唔珍惜反而熬底，肯定一事無成。分享一段小插曲，話說我早排去大學講Talk，散場後有個同學不斷同我講：「蛋Sir，我真係適合做DJ，我真係好想做，你幫吓我啦。」我見佢咁有心，就話即刻帶佢一齊搵俞琤，你知唔知當時佢畀乜反應我？
林：……
鄭：佢話都係未準備好，遲啲先算喎，呢個小朋友即刻俾我鬧咗一個鐘。我想講，呢個世界無懷才不遇，但機會只會留畀有準備同態度積極嘅人，想當年如果有人幫我引見俞琤，我多謝都嚟唔切啦，只係一味識自怨自艾，自嘲無人賞識唔掂㗎，不如勤力啲做好準備啦，機會唔等人㗎。
愛家又愛爸
一般父母為口奔馳，放假與子女上茶樓吃個包也難，更遑論父母是作息不定時的藝人，偏偏兩人百足咁多爪，還有餘暇與家人享天倫之樂，到底有何家事秘笈？
鄭：我嘅秘訣好簡單，無論任何時候都放屋企人喺第一位，我最緊要嘅係屋企人、最鍾意返屋企，你話我老土都係咁話。一家人，唔需要日日都有好多嘢傾，但我會盡量少應酬，多啲陪屋企人，呢樣嘢通行都知。以前做電台，唱片公司同事成日話：「阿蛋，今晚出嚟傾嘢。」而我一定會答：「有乜唔可以日頭傾，一定要夜晚出去傾？」基本上一切飯局我推得就推，記得有次英皇搞春茗，我有出席，連楊受成都上台開咪話：「阿蛋都有到，認真少見，哈。」
林：我阿爸以前都係咁教我哋幾兄弟姊妹，出街、飲茶一定要齊人，仲唔可以前後腳到。佢會設計遊戲俾我哋玩，例如每人畀三蚊，叫我哋入超市買糖，我計數會計到啱啱好，阿Jan（林海峰）多數買多咗，阿Lo（林曉峰）就專買啲抵食夾大件嘅糖。透過呢類小遊戲，不但反映到我哋幾兄弟姊妹性格，大家仲會更團結，從而維持良好家庭關係。
鄭：啱呀，我身邊好多白羊座嘅人，包括我老婆同我最敬愛嘅老闆俞琤，佢哋性格好簡單──堅持到底、一諾千金、怕人反悔，你嘅健身教練（林珊珊現任男友Michael）都係白羊座嘅。
林：係呀，佢同沙律（鄭丹瑞妻）兩個都係白羊座，一坐埋就有講唔完嘅話題，不過都唔及你同你爸爸多嘢講，每次去你屋企食飯，都有古仔聽。
鄭：我阿爸真係好多故事，不過大多數吹水居多，最叻係阿媽，每次聽到阿爸吹水都笑咪咪，唔出聲。
林：我覺得蛋媽道行好高，我都要向佢學習。家囡囡長大咯，更加覺得做父母應該多啲珍惜同子女傾心事嘅機會，因為肯聽你講嘢就只得呢兩三年，子女成長過程中，我哋做父母佔好大角色，呢句說話真係講得無錯。
後記
這篇訪問做得很輕鬆，兩人轉數快，零Deadair，全程自動波，甚麼也有問有答。美中不足是要求林珊珊唱幾句《勁草嬌花》，她即耍手擰頭：「唔好搞我啦，女都生咗兩個啦。」還把皮球交給鄭丹瑞，叫他代唱《那夜我替女兒「R」背脊》。一輪你推我讓你擋我閃，兩人幾乎同時間望手錶說：「PR姐姐話要走嘞。」最後半句歌詞都沒哼，那種拍檔廿年的默契，表露無遺。
《快樂的Egg》嘉賓
《快樂的Egg》
主持：鄭丹瑞與八大專上院校即將畢業的同學
播映時間：6月13日起逢周六10:00pm至11:00pm，在now香港台播出
《HaveaNiceDay》嘉賓
《HaveaNiceDay》
主持：林珊珊
播映時間：6月14日起逢周日10:00pm至11:00pm，在now香港台播出
