朱經武8月底就告別科技大學，返美國繼續研究工作，科大噚日特別搞咗個「歡送校長繽fun跑」運動會，farewell校長兼籌款。臨別秋波，朱校長都有落場跑步，仲話覺得科大師生對佢好好，佢好感動，梗係啦，好多學生送卡、送禮物畀佢，佢話即使離開科大，如果科大需要佢返嚟，就會返嚟㖭。
仲攞埋最佳造型獎
除咗跑步，科大仲搞咗最佳造型獎，結果就係由ice-creammakers勝出，呢隊由校長、副校長錢大康同科大公關組組成，佢哋扮番朱經武喺科大15周年扮廚師整雪糕畀學生嘅造型。
講番場接力跑，有成380人參加，由教職員同學生分成38隊，喺校內運動場接力跑步，其中勝出嗰隊科大田徑隊喺一個鐘頭內接力跑咗53個圈。每位參賽者最少捐出500蚊，最後籌到超過40萬，朱經武都好慷慨，自掏荷包捐成10萬，支持科大發展運動用途。