唔知大家有冇印象，索愛喺去年底，曾公佈一款配備1,210萬像素嘅拍攝「機王」Idou，網上討論區講到火紅火熱，但究竟幾時出，售價幾錢，一啲眉目都冇！日前，索愛再公佈3款旗艦級別作，一款係以連接PS3為賣點嘅Aino，第二款係以打機為賣點嘅Yari，至於第三款叫Satio……睇真啲，原來即係Idou嘅最新化名！
第四季推出
點解Idou要改名為Satio？呢樣就要問吓開發人員先知，同樣係1,210萬像素、觸控對焦、臉部追蹤、影像穩定、微笑快門、Geotagging……諗到跟影相有關嘅，幾乎有齊，但要喺度潑一盆冷水，因為以上功能之前已經公佈過，再翻案仲有乜意思。反而值得一提係Aino，佢內置針對PSP而開發嘅RemotePlay，只要連接Wi-Fi或3.5G，就可以結合PS3，隨時操作多媒體內容，隨街睇片、睇相。至於Yari則以體感遊戲作招徠，佢配備打機專用掣以及加速Sensor，只要到PlayNowArena，幾時都可以單撈最新遊戲。
據官方所講，以上3部機將於今年第四季推出，售價未定，即係話仲有半年時間，如果你真係咁忠於索愛，不如等多一陣，反正對網民嚟講，呢個話題隨時唔止傾半年。
