銀行自動化，對殘障人士尤其視障人士都幾唔方便，就以都市人冇咗唔得嘅自動櫃員機為例，視障人士睇唔到邊個位入卡、邊個位攞錢。不過，銀行業界由今日開始，喺9個用量最高嘅港鐵站共82部櫃員機度，加添觸覺指示標記，包括喺入卡位、出通知書同出錢嘅位置，加設凹凸標記，等視障人士一摸就知。
華華聽講，其實部份櫃員機已有啲凹凸標記，但如果櫃員機個畫面要求重新輸入密碼、揀服務或者揀戶口時，點算？希望銀行業可以快啲提供有發聲功能嘅系統，令視障人士真正受惠。
銀行公會嘅通告亦話，今次係同失明人士機構合作，了解過視障人士嘅需要，而且會密切監察效果。
講開銀公嘅通告，係由滙豐代發畀傳媒，其實銀公都有個秘書處，但據講資源有限，所以好多時都係由輪任主席銀行代為處理，作為業界代表，幫吓手冇托手踭嘅！