車路士喺上周六捧走英足盃後，咪以為溫布萊後備席、草地係軒迪克喺車路士嘅最後舞台，好戲在後頭，佢最後嗰part舞入到更衣室至跳，舞伴仲要係老闆阿巴莫域治！睇軒迪克一邊揸住雪茄，一邊捧住個大肚腩起勢fing，認真風騷。又抵佢風騷嘅，呢個神奇領隊再次能人所不能，以前冇一個領隊離任時同油王保持良好關係，強如摩連奴都冇happyending，除咗個「服」字，我求大俠真係諗唔到可以贈軒帥咩字嘞。
捧英足盃完美結局
「南美嘅、東歐嘅、非洲嘅，你諗到嘅舞步，我哋都有跳。」車仔前日英足盃決賽反勝愛華頓2:1捧盃後，職球員喺更衣室入面狂歡成粒鐘，祝捷之餘又歡送軒帥。軒帥功成身退，成個high晒，一般球迷睇個肥佬跳舞肯定唔開胃；但車路士職球員、球迷就別有一番滋味，更估唔到連油王阿巴都跳埋一份，球員最初目瞪口呆，定神後就影相拍片留念。
油王入主車仔後，雲尼亞里、摩連奴、格蘭離任時冇一個好來好往，睇見軒帥咁威，唔知幾個前任領隊有咩感受？
傳肥安上台6億掃阿古路
話就話軒帥已應承做球會技術顧問，叫做同球會冇斷絕關係，但基本上影響力好微。如今最後舞曲跳完，大將一去，係時候講吓展望，外國博彩公司Bet365睇得車仔幾死，開個車仔來季四大皆空嘅盤口，賠率得1.9倍，盛傳安察洛堤日內會正式加盟，唔通莊家唔係對車仔人腳冇信心，而係對肥安冇信心？另有傳肥安一上任就會出5,000萬鎊（約6億港元）簽馬體會當紮前鋒阿古路，一於放長雙眼等睇好戲。
想睇軒帥有幾high？click入 http://www.mailonsunday.co.uk/sport/football/article-1189808/VIDEO-SPECIAL-Guus-Roman-Saturday-night-fever.html啦！
