女人真係唔可以睇小，中華煤氣內部定期舉辦住宅式氣體供應喉管系統安裝課程，即係學裝煤氣喉，最近一期課程首次有女同事參加，合格唔在講，攞咗技工牌，裝喉分數仲係全班最高分，打低晒啲男同事。邊個女士咁巴閉？咪係企業傳訊部一姐黃秀英囉。
秀英姐係資深傳媒人，曾任機管局高層，後來過檔煤氣，佢話唔好睇小佢係女流之輩，屋企嘅小維修都係佢一手包辦，老公蹺埋手就得，今次膽粗粗參加裝煤氣喉課程，了解前線員工安裝喉管情況，學過先發現做技工好辛苦。課程唔係紙上談兵，要擒高擒低甚至捐入廚櫃底裝喉，小啲體力都唔得。但佢好謙話今次實習裝喉攞到全場最高分自己都好意外。打響咗頭炮，佢話打算考埋安裝同維修煤氣爐嘅牌。