遊行、募捐、放風箏、收集簽名，寄聖誕卡，在燭光集會遞上蠟燭、紙杯和場刊……年年月月，默默支撐着支聯會工作的，是一班義工。為六四，他們付出的比你我都多，雖然大家連他們的名字也未必知道。 記者：張嘉雯、雷子樂
關振邦 支聯會常委
「一直做到平反六四」
曾經激動、曾經輕狂，關振邦從「扯衫尾」的支聯會義工到擔任常委，由踢鐵馬、衝擊警方防線，到放下自己，讓別人表達哀思；他最大的心願，是六四集會毋須沒了期舉辦下去，是非黑白有一天昭雪。
「柴娃娃一做就19年」
「嗰時社會相對穩定，政治嘅嘢唔切身，中英聯合聲明都唔會理。」89年，關振邦17歲，剛踏出社會工作，家住屯門，百萬人大遊行翌日，正睡覺的他聽到區議員吳明欽在樓下「嗌咪」，聲援學運，「我平時唔關心時事，嗰日唔知點解聽到，唔知點解落咗去行埋一份，之後下晝遮打遊行，我又唔知點解參加咗，唔知點解由頭行到尾。」
眼前的他，說起當年的片段，平平淡淡。談每年的六四集會，如何事前準備、事後清理，場地佈置、派蠟燭、派紙杯……年復年，看不出一點悲傷和怒火，但原來年輕時代，他也曾激動過。
「以前好即興，去跑馬地圍舊新華社，唔可以明正言順去，警察會阻撓，要想辦法突破警察防線，衝擊佢。」89年後每年6月3日晚，當上支聯會義工的關振邦在維園佈置完場地，就想方法到新華社悼念，「有次我哋十幾人，坐貨van，一到咗，好似飛虎隊咁彈晒落車，跑落去即刻拉橫額。」
「嗰時柴娃娃，純粹想去參與其中，表達吓、支持吓，邊有諗到一做就做咗19年。」當上義工後，他直言只是「執頭執尾」，「有啲人負責表演，有啲人反新聞封鎖，《文匯》嗰時社論開天窗，有屠殺紀錄，我哋就將佢寄返大陸，成班坐喺度係咁入報紙，入咗幾年，寄咗幾萬份。」
參與了多年集會，他說97年那次最教他難忘，「當時嚟講要過渡係好大嘅挑戰，嗰時好多人嚟，好多以前嘅朋友，大家都擔心以後無機會，集會結束咗之後啲巿民都唔願散去，好感動。」
「最重要係活動順利」
由一個最普通的參加者，到98年加入常委，關振邦的角色有重大轉變，「嗰時後生啲，純粹係做義工，鍾意做就去做，家唔係自己去做，係協助人去做，要策劃、籌備、呼籲人參加，好唔同。」
「最重要係有個活動可以畀人表達，個活動可以順順利利、安安全全咁進行，佢嚟到，畀支蠟燭佢，畀份場刊佢，等佢可以靜靜坐埋一邊就足夠。」眨眼就20年，關振邦形容在支聯會的日子比上班還要辛苦，「但係為自己嘅目標去做，做得好投入，就算搬搬抬抬，事後都覺得好值得，唔好講到係犧牲，只係選擇咗一啲嘢，就一定要付出，條路係自己揀，就要負責。」
「要令人有機會悼念」
「唔好話做咗好多嘢，英雄絕對唔係我哋，我哋只係要令人有機會表達悼念，香港係中國土地上唯一可以公開悼念嘅地方，如果連呢啲都唔做，歷史書唔講，學校唔教，人人北望神州，個社會會點？」
他相信，平反六四有指標作用，「件事至今冇完結到，好多人仲坐緊監，好多家屬受嘅傷害仲未完，被害者仍然被施以迫害，平反六四，意味呢個政權敢於面對自己嘅過失，解開好多人嘅心結。」
關振邦不希望六四集會永遠舉辦下去，「有時都會諗，希望下年唔使做，不過就唔會心存幻想，覺得可以喺短時間內做到，我哋會一直做，做到有平反（六四）為止。」
何少慈 支聯會老義工
為民主絕食近20次
為救魏京生，她跑到新華社外露宿抗議了整整一個月；為了王丹、為維權，她絕食過近20次。為平反六四，這副老骨頭年復年的站在人群裏，不停彎腰鞠躬收集簽名。為了民主，68歲的何少慈（何姨）不斷向前衝呀衝，卻不期望有生之年等到六四平反。這些年來，燭光中少了憤怒的口號，多了悠揚的歌聲；街上多了不知六四的小孩；捐款箱裏多了人民幣，老人家仍深信：堅持下去，下一代定能看到曙光。
「保持體力撐落去」
退休小學教師何少慈是支聯會義工。除夕倒數、清明節獻花、5月街頭簽名、大遊行、6月燭光集會、中秋燈火會、投寄聖誕卡、民主年宵，她都參與。何姨笑稱，支聯會只在農曆新年暫停抗爭，「你都知啦，阿古（古思堯）慣咗抬棺材，怕大吉利是。」
社運常客都知道何姨，佩服她熱心，驚嘆她抗爭時精力無窮無盡。爭取釋放王丹、聲援內地維權律師，她絕食過「超過十次，唔夠廿次」，「除非我唔知，否則一定到！」她自言是「民主鐵人」，每次絕食最少48小時，最長72小時。「絕食時我唔會郁，唔講嘢，只飲清水，保持體力，撐落去！」捱飢抵餓很苦，但何姨說，爭取民主必須付出代價，當年廣場上的學生，受的苦比她更多。
幾十年來，沒有任何事令何姨掉眼淚，惟獨六四屠城，教她肝腸寸斷，悲痛莫名。訪問期間，她突然走到廚房拿出碗筷，告訴記者，89年6月4日黃昏，她在家中扒着飯看電視。新聞報道播放解放軍開槍的片段，她已眼淚、鼻水「送飯」。「人命嚟㗎！有乜理由開槍？咁大個國家冇水炮？冇橡膠子彈？點可以當人民喺豬咁殺？」
新華社外露宿一月
94年，何姨退休，全情投入支聯會義工行列。「當時臨近97，好驚回歸後唔可以再公開爭取平反六四。」95年，民運人士魏京生再被判刑，何姨跟梁國雄、古思堯、徐百弟、陶君行等「兄弟」，到跑馬地新華社門外露宿了一個月。97年，魏京生獲保外就醫，「有咁多戰友一齊爭取，覺得好榮幸！」那是一段美好的時光，志同道合的戰友，瑟縮在攝氏12度的街頭。他們窮得沒錢買帳篷，將身軀蜷曲在椅子上打盹。某夜凌晨兩、三點，何姨在夢中驚醒，「哈，抬眼望，見到阿石（立法會前議員劉千石）嚟探我地喎，當時大家都凍到不得了。」
提醒不要遺忘歷史
20年，許多事在變。何姨見證這些變遷，燭光集會的氣氛不再像當初的悲痛、嚴肅，「覺唔覺華叔講嘢冇咁長篇大論呀？」播影片、唱《自由花》的時間長了。時間，冲淡了憤怒。何姨說，支聯會的工作改用較柔和的方法，提醒世人不要遺忘歷史。
站在街頭收集簽名，遭遇也不一樣。從前一呼百應，如今年輕人會拒絕簽署，「問佢哋點解唔簽，佢話都唔知六四喺乜。」何姨必會把握機會，向下一代講解歷史真相。可幸的是，內地遊客從最初不斷迴避，到近年會駐足細閱支聯會展板，甚至主動在捐款箱投下人民幣、購買六四紀念品。
年近七旬，何姨不諱言未必看到六四平反，但本着良知，這條路，仍是要走下去。「（台灣）二二八事件，都要等到蔣介石死後先平反到啦。」她寄語香港人，只要一直堅持下去，終有一天，會望見民主國度。