本季最後一次同大家見面，由首日開始都以冷為先，今期一於整條冷到痹嘅過關，攞番尾彩。隔籬牛兄玩西甲波，我頭關都揀場紐文西亞主場和西維爾，3.55倍D做膽。
第3嘅西維爾由於對賽成績好過馬德里體育會，換言之已肯定攞到直接參戰歐聯資格，講真呢場波贏輸都無所謂。對手紐文西亞已經夠晒慘，來季篤定降落西乙，人哋咁陰功，西維爾都冇理由要踩多腳。話晒煞科戰喺主場出擊，紐文西亞向球迷交代下，只少不敗收場，隨時悶波一場開埋6倍「和/和」都唔奇。
卡坦尼亞客Ｗ有冷味
意甲嗰邊，17位嘅博洛尼亞係就係要爭護級，但呢班波全季聯賽，未試過主場連勝㗎！仲要係贏完即輸嘅比率好高㖭！對上主場2:1險勝萊切，今場對放開懷抱嚟踢嘅卡坦尼亞，隨時爆鑊勁。
卡坦尼亞雖然不愁降班，但係踢風流波之下，上場3:1贏到拿玻里，再之前更差啲作客搞死羅馬，最後僅輸3:4咋。今場個客W有成7.5倍，買少少都要啦！
其實呢個禮拜多場巴甲都好有心水，另一邊我已推介咗國際體育會2:0贏艾華爾，但本欄一向玩冷嘢，大可補多個「主其他」波膽，有40倍好抵買。最後再追愛隊祖雲達斯半場落後呢條路，佢哋煞科戰雖然主場對拉素，但早排意盃4強次回合，拉素上半場都領先過祖記，5.6倍「半勝」值得一試。文︰畢傑