早前擔任康城影展評審的舒淇，前晚以清爽及肩短髮示人，舒淇謂剪了20吋長髮，是20年來首次，更回首哀悼長髮。舒淇舊愛黎明將開演唱會，她大方表示會捧場，更指黎明最好公開婚訊，剪去三千煩惱絲，果然特別撇脫。
舒淇、楊紫瓊、中田英壽、潮人黃偉文（Wyman）、名模熊黛林及杜鵑等，前晚在沙田出席Dior贊助的「黃金時裳：巴黎與倫敦1947至1957年」展覽揭幕酒會。剪了一頭及肩短髮的舒淇，非常風騷地轉來轉去展示新髮型，問她為何剪去三千煩惱絲？她說：「我想清爽啲，因為上星期好忙，一頭鬈髮我覺得好煩，身邊朋友都鍾意我剪呢頭短髮，因為我長髮太耐喇。」
預告睇黎明個唱
舒淇續說：「我20年冇剪過，一次過剪咗20吋，剪嘅時候，我仲擰轉頭望咗兩分鐘saygoodbye，返屋企仲幫佢哋祈禱。」問她轉新髮型，是否想吸引異性？舒淇笑住說：「其次，最緊要吸引自己。」她又解釋之前在康城擔任影展評審時，表示願接性感戲，其實意思只是想接大師作品。
舊愛黎明7月中會在紅館舉行4場「DreamWeddingLeonLiveSummer09」，舒淇大方表示有時間一定捧場。有傳黎明會在個唱中公佈婚訊，舒淇說：「最好啦，開心事都值得開心。」但她不肯透露二人有否聯絡。
黃偉文狂收禮物
黃偉文之前40歲生日，大批好友明星到賀，他前晚興奮之情仍未過，他說：「嗰晚同場有另一個品牌活動，我啲明星仲多個對方，我係A級頒獎陣容，好多人錫我。」他指生日派對主題是「扮靚」，Wyman說：「Eason（陳奕迅）着裙，阿徐（徐濠縈）賣大包，之前賣叉燒包，嗰晚賣蓮蓉包，仲有君如三代同堂。好多禮物都好好笑，Juno（麥浚龍）送咗支黑色大蠟燭，佢阿哥（大寶）就送咗個金元寶，夾埋係元寶蠟燭。」他謂更有朋友將他填過的千多首歌入到iPod送給他。
採訪：羅慧敏
攝影：陳志嵐
